यत्र दैवासुरे युद्धे समुत्पन्ने सुदारुणे देवाश् चैवासुराश् चैव पितामहम् अथाब्रुवन्
आवयोर् भगवन् युद्धे को विजेता भविष्यति ब्रूहि नः सर्वभूतेश श्रोतुम् इच्छाम तत्त्वतः
येषाम् अर्थाय संग्रामे रजिर् आत्तायुधः प्रभुः योत्स्यते ते विजेष्यन्ति त्रींल् लोकान् नात्र संशयः
यतो रजिर् धृतिस् तत्र श्रीश् च तत्र यतो धृतिः यतो धृतिश् च श्रीश् चैव धर्मस् तत्र जयस् तथा
ते देवा दानवाः प्रीता देवेनोक्ता रजिं तदा अभ्ययुर् जयम् इच्छन्तो वृण्वानास् तं नरर्षभम्
स हि स्वर्भानुदौहित्रः प्रभायां समपद्यत राजा परमतेजस्वी सोमवंशविवर्धनः
ते हृष्टमनसः सर्वे रजिं वै देवदानवाः ऊचुर् अस्मज्जयाय त्वं गृहाण वरकार्मुकम्
अथोवाच रजिस् तत्र तयोर् वै देवदैत्ययोः अर्थज्ञः स्वार्थम् उद्दिश्य यशः स्वं च प्रकाशयन्
यदि दैत्यगणान् सर्वाञ् जित्वा वीर्येण वासवः इन्द्रो भवामि धर्मेण ततो योत्स्यामि संयुगे
देवाः प्रथमतो विप्राः प्रतीयुर् हृष्टमानसाः एवं यथेष्टं नृपते कामः संपद्यतां तव
श्रुत्वा सुरगणानां तु वाक्यं राजा रजिस् तदा पप्रच्छासुरमुख्यांस् तु यथा देवान् अपृच्छत
दानवा दर्पसंपूर्णाः स्वार्थम् एवावगम्य ह प्रत्यूचुस् तं नृपवरं साभिमानम् इदं वचः
अस्माकम् इन्द्रः प्रह्रादो यस्यार्थे विजयामहे अस्मिंस् तु समरे राजंस् तिष्ठ त्वं राजसत्तम
स तथेति ब्रुवन्न् एव देवैर् अप्य् अतिचोदितः भविष्यसीन्द्रो जित्वैनं देवैर् उक्तस् तु पार्थिवः
जघान दानवान् सर्वान् ये ऽवध्या वज्रपाणिनः स विप्रनष्टां देवानां परमश्रीः श्रियं वशी
निहत्य दानवान् सर्वान् आजहार रजिः प्रभुः ततो रजिं महावीर्यं देवैः सह शतक्रतुः
रजिपुत्रो ऽहम् इत्य् उक्त्वा पुनर् एवाब्रवीद् वचः इन्द्रो ऽसि तात देवानां सर्वेषां नात्र संशयः
यस्याहम् इन्द्रः पुत्रस् ते ख्यातिं यास्यामि कर्मभिः स तु शक्रवचः श्रुत्वा वञ्चितस् तेन मायया
तथैवेत्य् अब्रवीद् राजा प्रीयमाणः शतक्रतुम् तस्मिंस् तु देवैः सदृशो दिवं प्राप्ते महीपतौ
दायाद्यम् इन्द्राद् आजह्रू राज्यं तत्तनया रजेः पञ्च पुत्रशतान्य् अस्य तद् वै स्थानं शतक्रतोः
समाक्रामन्त बहुधा स्वर्गलोकं त्रिविष्टपम् ते यदा तु स्वसंमूढा रागोन्मत्ता विधर्मिणः
ब्रह्मद्विषश् च संवृत्ता हतवीर्यपराक्रमाः ततो लेभे स्वम् ऐश्वर्यम् इन्द्रः स्थानं तथोत्तमम्
हत्वा रजिसुतान् सर्वान् कामक्रोधपरायणान् य इदं च्यावनं स्थानात् प्रतिष्ठानं शतक्रतोः शृणुयाद् धारयेद् वापि न स दौर्गत्यम् आप्नुयात्
रम्भो ऽनपत्यस् त्व् आसीच् च वंशं वक्ष्याम्य् अनेनसः अनेनसः सुतो राजा प्रतिक्षत्रो महायशाः
प्रतिक्षत्रसुतश् चासीत् संजयो नाम विश्रुतः संजयस्य जयः पुत्रो विजयस् तस्य चात्मजः
विजयस्य कृतिः पुत्रस् तस्य हर्यत्वतः सुतः हर्यत्वतसुतो राजा सहदेवः प्रतापवान्
सहदेवस्य धर्मात्मा नदीन इति विश्रुतः नदीनस्य जयत्सेनो जयत्सेनस्य संकृतिः
संकृतेर् अपि धर्मात्मा क्षत्रवृद्धो महायशाः अनेनसः समाख्याताः क्षत्रवृद्धस्य चापरः
क्षत्रवृद्धात्मजस् तत्र सुनहोत्रो महायशाः सुनहोत्रस्य दायादास् त्रयः परमधार्मिकाः
काशः शलश् च द्वाव् एतौ तथा गृत्समदः प्रभुः पुत्रो गृत्समदस्यापि शुनको यस्य शौनकः