शालग्रामे महाचैत्र्यां स्नानदानेन यत् फलम् दृष्ट्वा नरो लभेत् कृष्णं तत् फलं दक्षिणामुखम्
महाभिधानकार्त्तिक्यां पुष्करे यत् फलं स्मृतम् दृष्ट्वा नरो लभेत् कृष्णं तत् फलं दक्षिणामुखम्
यत् फलं स्नानदानेन गङ्गासागरसंगमे दृष्ट्वा नरो लभेत् कृष्णं तत् फलं दक्षिणामुखम्
ग्रस्ते सूर्ये कुरुक्षेत्रे स्नानदानेन यत् फलम् दृष्ट्वा नरो लभेत् कृष्णं तत् फलं दक्षिणामुखम्
गङ्गायां सर्वतीर्थेषु यामुनेषु च भो द्विजाः सारस्वतेषु तीर्थेषु तथान्येषु सरःसु च
यत् फलं स्नानदानेन विधिवत् समुदाहृतम् दृष्ट्वा नरो लभेत् कृष्णं तत् फलं दक्षिणामुखम्
पुष्करे चाथ तीर्थेषु गये चामरकण्टके नैमिषादिषु तीर्थेषु क्षेत्रेष्व् आयतनेषु च
यत् फलं स्नानदानेन राहुग्रस्ते दिवाकरे दृष्ट्वा नरो लभेत् कृष्णं तत् फलं दक्षिणामुखम्
अथ किं पुनर् उक्तेन भाषितेन पुनः पुनः यत् किंचित् कथितं चात्र फलं पुण्यस्य कर्मणः
वेदशास्त्रे पुराणे च भारते च द्विजोत्तमाः धर्मशास्त्रेषु सर्वेषु तथान्यत्र मनीषिभिः
दृष्ट्वा नरो लभेत् कृष्णं तत् फलं सहलायुधम् सकलं भद्रया सार्धं व्रजन्तं दक्षिणामुखम्
गुडिवामण्डपं यान्तं ये पश्यन्ति रथे स्थितम् कृष्णं बलं सुभद्रां च ते यान्ति भवनं हरेः
ये पश्यन्ति तदा कृष्णं सप्ताहं मण्डपे स्थितम् हलिनं च सुभद्रां च विष्णुलोकं व्रजन्ति ते
केन सा निर्मिता यात्रा दक्षिणस्यां जगत्पते यात्राफलं च किं तत्र प्राप्यते ब्रूहि मानवैः
किमर्थं सरसस् तीरे राज्ञस् तस्य जगत्पते पवित्रे विजने देशे गत्वा तत्र च मण्डपे
कृष्णः संकर्षणश् चैव सुभद्रा च रथेन ते स्वस्थानं संपरित्यज्य सप्तरात्रं वसन्ति वै
इन्द्रद्युम्नेन भो विप्राः पुरा वै प्रार्थितो हरिः सप्ताहं सरसस् तीरे मम यात्रा भवत्व् इति
गुडिवा नाम देवेश भुक्तिमुक्तिफलप्रदा तस्मै किल वरं चासौ ददौ स पुरुषोत्तमः
सप्ताहं सरसस् तीरे तव राजन् भविष्यति गुडिवा नाम यात्रा मे सर्वकामफलप्रदा
ये मां तत्रार्चयिष्यन्ति श्रद्धया मण्डपे स्थितम् संकर्षणं सुभद्रां च विधिवत् सुसमाहिताः
ब्राह्मणाः क्षत्रिया वैश्याः स्त्रियः शूद्राश् च वै नृप पुष्पैर् गन्धैस् तथा धूपैर् दीपैर् नैवेद्यकैर् वरैः
उपहारैर् बहुविधैः प्रणिपातैः प्रदक्षिणैः जयशब्दैस् तथा स्तोत्रैर् गीतैर् वाद्यैर् मनोहरैः
न तेषां दुर्लभं किंचित् फलं यस्य यद् ईप्सितम् भविष्यति नृपश्रेष्ठ मत्प्रसादाद् असंशयम्
एवम् उक्त्वा तु तं देवस् तत्रैवान्तरधीयत स तु राजवरः श्रीमान् कृतकृत्यो ऽभवत् तदा
तस्मात् सर्वप्रयत्नेन गुडिवायां द्विजोत्तमाः सर्वकामप्रदं देवं पश्येत् तं पुरुषोत्तमम्
अपुत्रो लभते पुत्रान् निर्धनो लभते धनम् रोगाच् च मुच्यते रोगी कन्या प्राप्नोति सत्पतिम्
आयुः कीर्तिं यशो मेधां बलं विद्यां धृतिं पशून् नरः संततिम् आप्नोति रूपयौवनसंपदम्
यान् यान् समीहते भोगान् दृष्ट्वा तं पुरुषोत्तमम् नरो वाप्य् अथवा नारी तांस् तान् प्राप्नोत्य् असंशयम्
यात्रां कृत्वा गुडिवाख्यां विधिवत् सुसमाहितः आषाढस्य सिते पक्षे नरो योषिद् अथापि वा
दृष्ट्वा कृष्णं च रामं च सुभद्रां च द्विजोत्तमाः दशपञ्चाश्वमेधानां फलं प्राप्नोति चाधिकम्