तस्मिन् क्षेत्रवरे लिङ्गं भास्करेश्वरसंज्ञितम् पश्यन्ति ये तु तं देवं स्नात्वा कुण्डे महेश्वरम्
आदित्येनार्चितं पूर्वं देवदेवं त्रिलोचनम् सर्वपापविनिर्मुक्ता विमानवरम् आस्थिताः
उपगीयमाना गन्धर्वैः शिवलोकं व्रजन्ति ते तिष्ठन्ति तत्र मुदिताः कल्पम् एकं द्विजोत्तमाः
भुक्त्वा तु विपुलान् भोगाञ् शिवलोके मनोरमान् पुण्यक्षयाद् इहायाता जायन्ते प्रवरे कुले
अथवा योगिनां गेहे वेदवेदाङ्गपारगाः उत्पद्यन्ते द्विजवराः सर्वभूतहिते रताः
मोक्षशास्त्रार्थकुशलाः सर्वत्र समबुद्धयः योगं शंभोर् वरं प्राप्य ततो मोक्षं व्रजन्ति ते
तस्मिन् क्षेत्रवरे पुण्ये लिङ्गं यद् दृश्यते द्विजाः पूज्यापूज्यं च सर्वत्र वने रथ्यान्तरे ऽपि वा
चतुष्पथे श्मशाने वा यत्र कुत्र च तिष्ठति दृष्ट्वा तल् लिङ्गम् अव्यग्रः श्रद्धया सुसमाहितः
स्नापयित्वा तु तं भक्त्या गन्धैः पुष्पैर् मनोहरैः धूपैर् दीपैः सनैवेद्यैर् नमस्कारैस् तथा स्तवैः
दण्डवत्प्रणिपातैश् च नृत्यगीतादिभिस् तथा संपूज्यैवं विधानेन शिवलोकं व्रजेन् नरः
नारी वा द्विजशार्दूलाः संपूज्य श्रद्धयान्विता पूर्वोक्तं फलम् आप्नोति नात्र कार्या विचारणा
कः शक्नोति गुणान् वक्तुं समग्रान् मुनिसत्तमाः तस्य क्षेत्रवरस्याथ ऋते देवान् महेश्वरात्
तस्मिन् क्षेत्रोत्तमे गत्वा श्रद्धयाश्रद्धयापि वा माधवादिषु मासेषु नरो वा यदि वाङ्गना
यस्मिन् यस्मिंस् तिथौ विप्राः स्नात्वा बिन्दुसरोम्भसि पश्येद् देवं विरूपाक्षं देवीं च वरदां शिवाम्
गणं चण्डं कार्त्तिकेयं गणेशं वृषभं तथा कल्पद्रुमं च सावित्रीं शिवलोकं स गच्छति
स्नात्वा च कापिले तीर्थे विधिवत् पापनाशने प्राप्नोत्य् अभिमतान् कामाञ् शिवलोकं स गच्छति
यः स्तम्भ्यं तत्र विधिवत् करोति नियतेन्द्रियः कुलैकविंशम् उद्धृत्य शिवलोकं स गच्छति
एकाम्रके शिवक्षेत्रे वाराणसीसमे शुभे स्नानं करोति यस् तत्र मोक्षं स लभते ध्रुवम्
विरजे विरजा माता ब्रह्माणी संप्रतिष्ठिता यस्याः संदर्शनान् मर्त्यः पुनात्य् आसप्तमं कुलम्
सकृद् दृष्ट्वा तु तां देवीं भक्त्यापूज्य प्रणम्य च नरः स्ववंशम् उद्धृत्य मम लोकं स गच्छति
अन्याश् च तत्र तिष्ठन्ति विरजे लोकमातरः सर्वपापहरा देव्यो वरदा भक्तिवत्सलाः
आस्ते वैतरणी तत्र सर्वपापहरा नदी यस्यां स्नात्वा नरश्रेष्ठः सर्वपापैः प्रमुच्यते
आस्ते स्वयंभूस् तत्रैव क्रोडरूपी हरिः स्वयम् दृष्ट्वा प्रणम्य तं भक्त्या परं विष्णुं व्रजन्ति ते
कापिले गोग्रहे सोमे तीर्थे चालाबुसंज्ञिते मृत्युंजये क्रोडतीर्थे वासुके सिद्धकेश्वरे
तीर्थेष्व् एतेषु मतिमान् विरजे संयतेन्द्रियः गत्वाष्टतीर्थं विधिवत् स्नात्वा देवान् प्रणम्य च
सर्वपापविनिर्मुक्तो विमानवरम् आस्थितः उपगीयमानो गन्धर्वैर् मम लोके महीयते
विरजे यो मम क्षेत्रे पिण्डदानं करोति वै स करोत्य् अक्षयां तृप्तिं पितॄणां नात्र संशयः
मम क्षेत्रे मुनिश्रेष्ठा विरजे ये कलेवरम् परित्यजन्ति पुरुषास् ते मोक्षं प्राप्नुवन्ति वै
स्नात्वा यः सागरे मर्त्यो दृष्ट्वा च कपिलं हरिम् पश्येद् देवीं च वाराहीं स याति त्रिदशालयम्
सन्ति चान्यानि तीर्थानि पुण्यान्य् आयतनानि च तत्काले तु मुनिश्रेष्ठा वेदितव्यानि तानि वै