चौरप्रायाश् च राजानो युगान्ते समुपस्थिते कुण्डीवृषा नैकृतिकाः सुरापा ब्रह्मवादिनः
अश्वमेधेन यक्ष्यन्ते युगान्ते द्विजसत्तमाः याजयिष्यन्त्य् अयाज्यांस् तु तथाभक्ष्यस्य भक्षिणः
ब्राह्मणा धनतृष्णार्ता युगान्ते समुपस्थिते भोःशब्दम् अभिधास्यन्ति न च कश्चित् पठिष्यति
एकशङ्खास् तथा नार्यो गवेधुकपिनद्धकाः नक्षत्राणि विवर्णानि विपरिता दिशो दश
संध्यारागो विदग्धाङ्गो भविष्यति युगक्षये प्रेषयन्ति पितॄन् पुत्रा वधूः श्वश्रूः स्वकर्मसु
युगेष्व् एवं निवत्स्यन्ति प्रमदाश् च नरास् तथा अकृत्वाग्राणि भोक्ष्यन्ति द्विजाश् चैवाहुताग्नयः
भिक्षां बलिम् अदत्त्वा च भोक्ष्यन्ति पुरुषाः स्वयम् वञ्चयित्वा पतीन् सुप्तान् गमिष्यन्ति स्त्रियो ऽन्यतः
न व्याधितान् नाप्य् अरूपान् नोद्यतान् नाप्य् असूयकान् कृते न प्रतिकर्ता च युगे क्षीणे भविष्यति
एवं विलम्बिते धर्मे मानुषाः करपीडिताः कुत्र देशे निवत्स्यन्ति किमाहारविहारिणः
किंकर्माणः किमीहन्तः किंप्रमाणाः किमायुषः कां च काष्ठां समासाद्य प्रपत्स्यन्ति कृतं युगम्
अत ऊर्ध्वं च्युते धर्मे गुणहीनाः प्रजास् तथा शीलव्यसनम् आसाद्य प्राप्स्यन्ति ह्रासम् आयुषः
आयुर्हान्या बलग्नानिर् बलग्नान्या विवर्णता वैवर्ण्याद् व्याधिसंपीडा निर्वेदो व्याधिपीडनात्
निर्वेदाद् आत्मसंबोधः संबोधाद् धर्मशीलता एवं गत्वा परां काष्ठां प्रपत्स्यन्ति कृतं युगम्
उद्देशतो धर्मशीलाः केचिन् मध्यस्थतां गताः किंधर्मशीलाः केचित् तु केचिद् अत्र कुतूहलाः
प्रत्यक्षम् अनुमानं च प्रमाणम् इति निश्चिताः अप्रमाणं करिष्यन्ति सर्वम् इत्य् अपरे जनाः
नास्तिक्यपरताश् चापि केचिद् धर्मविलोपकाः भविष्यन्ति नरा मूढा द्विजाः पण्डितमानिनः
तदात्वमात्रश्रद्धेया शास्त्रज्ञानबहिष्कृताः दाम्भिकास् ते भविष्यन्ति नरा ज्ञानविलोपिताः
तथा विलुलिते धर्मे जनाः श्रेष्ठपुरस्कृताः शुभान् समाचरिष्यन्ति दानशीलपरायणाः
सर्वभक्षाः स्वयंगुप्ता निर्घृणा निरपत्रपाः भविष्यन्ति तदा लोके तत् कषायस्य लक्षणम्
कषायोपप्लवे काले ज्ञाननिष्ठाप्रणाशने सिद्धिम् अल्पेन कालेन प्राप्स्यन्ति निरुपस्कृताः
विप्राणां शाश्वतीं वृत्तिं यदा वर्णावरे जनाः संश्रयिष्यन्ति भो विप्रास् तत् कषायस्य लक्षणम्
महायुद्धं महावर्षं महावातं महातपः भविष्यति युगे क्षीणे तत् कषायस्य लक्षणम्
विप्ररूपेण यक्षांसि राजानः कर्णवेदिनः पृथिवीम् उपभोक्ष्यन्ति युगान्ते समुपस्थिते
निःस्वाध्यायवषट्काराः कुनेतारो ऽभिमानिनः क्रव्यादा ब्रह्मरूपेण सर्वभक्ष्या वृथाव्रताः
मूर्खाश् चार्थपरा लुब्धाः क्षुद्राः क्षुद्रपरिच्छदाः व्यवहारोपवृत्ताश् च च्युता धर्माश् च शाश्वतात्
हर्तारः पररत्नानां परदारप्रधर्षकाः कामात्मानो दुरात्मानः सोपधाः प्रियसाहसाः
तेषु प्रभवमाणेषु जनेष्व् अपि च सर्वशः अभाविनो भविष्यन्ति मुनयो बहुरूपिणः
कलौ युगे समुत्पन्नाः प्रधानपुरुषाश् च ये कथायोगेन तान् सर्वान् पूजयिष्यन्ति मानवाः
सस्यचौरा भविष्यन्ति तथा चैलापहारिणः भोक्ष्यभोज्यहराश् चैव करण्डानां च हारिणः
चौराश् चौरस्य हर्तारो हन्ता हन्तुर् भविष्यति चौरैश् चौरक्षये चापि कृते क्षेमं भविष्यति