अनोस् तु पुत्रो धर्मो ऽभूद् द्यूतस् तस्यात्मजो ऽभवत् द्यूताद् वनदुहो जज्ञे प्रचेतास् तस्य चात्मजः
प्रचेतसः सुचेतास् तु कीर्तितास् त्व् अनवो मया बभूवुस् तु यदोः पुत्राः पञ्च देवसुतोपमाः
सहस्रादः पयोदश् च क्रोष्टा नीलो ऽञ्जिकस् तथा सहस्रादस्य दायादास् त्रयः परमधार्मिकाः
हैहयश् च हयश् चैव राजा वेणुहयस् तथा हैहयस्याभवत् पुत्रो धर्मनेत्र इति श्रुतः
धर्मनेत्रस्य कार्तस् तु साहञ्जस् तस्य चात्मजः साहञ्जनी नाम पुरी तेन राज्ञा निवेशिता
आसीन् महिष्मतः पुत्रो भद्रश्रेण्यः प्रतापवान् भद्रश्रेण्यस्य दायादो दुर्दमो नाम विश्रुतः
दुर्दमस्य सुतो धीमान् कनको नाम नामतः कनकस्य तु दायादाश् चत्वारो लोकविश्रुताः
कृतवीर्यः कृतौजाश् च कृतधन्वा तथैव च कृताग्निस् तु चतुर्थो ऽभूत् कृतवीर्याद् अथार्जुनः
यो ऽसौ बाहुसहस्रेण सप्तद्वीपेश्वरो ऽभवत् जिगाय पृथिवीम् एको रथेनादित्यवर्चसा
स हि वर्षायुतं तप्त्वा तपः परमदुश्चरम् दत्तम् आराधयाम् आस कार्तवीर्यो ऽत्रिसंभवम्
तस्मै दत्तो वरान् प्रादाच् चतुरो भूरितेजसः पूर्वं बाहुसहस्रं तु प्रार्थितं सुमहद् वरम्
अधर्मे ऽधीयमानस्य सद्भिस् तत्र निवारणम् उग्रेण पृथिवीं जित्वा धर्मेणैवानुरञ्जनम्
संग्रामान् सुबहूञ् जित्वा हत्वा चारीन् सहस्रशः संग्रामे वर्तमानस्य वधं चाभ्यधिकाद् रणे
तस्य बाहुसहस्रं तु युध्यतः किल भो द्विजाः योगाद् योगीश्वरस्येव प्रादुर्भवति मायया
तेनेयं पृथिवी सर्वा सप्तद्वीपा सपत्तना ससमुद्रा सनगरा उग्रेण विधिना जिता
तेन सप्तसु द्वीपेषु सप्त यज्ञशतानि च प्राप्तानि विधिना राज्ञा श्रूयन्ते मुनिसत्तमाः
सर्वे यज्ञा मुनिश्रेष्ठाः सहस्रशतदक्षिणाः सर्वे काञ्चनयूपाश् च सर्वे काञ्चनवेदयः
सर्वे देवैर् मुनिश्रेष्ठा विमानस्थैर् अलंकृतैः गन्धर्वैर् अप्सरोभिश् च नित्यम् एवोपशोभिताः
यस्य यज्ञे जगौ गाथां गन्धर्वो नारदस् तथा वरीदासात्मजो विद्वान् महिम्ना तस्य विस्मितः
न नूनं कार्तवीर्यस्य गतिं यास्यन्ति पार्थिवाः यज्ञैर् दानैस् तपोभिश् च विक्रमेण श्रुतेन च
स हि सप्तसु द्वीपेषु चर्मी खड्गी शरासनी रथी द्वीपान् अनुचरन् योगी संदृश्यते नृभिः
अनष्टद्रव्यता चैव न शोको न च विभ्रमः प्रभावेण महाराज्ञः प्रजा धर्मेण रक्षतः
स सर्वरत्नभाक् सम्राट् चक्रवर्ती बभूव ह स एव पशुपालो ऽभूत् क्षेत्रपालः स एव च
स एव वृष्ट्या पर्जन्यो योगित्वाद् अर्जुनो ऽभवत् स वै बाहुसहस्रेण ज्याघातकठिनत्वचा
भाति रश्मिसहस्रेण शरदीव च भास्करः स हि नागान् मनुष्येषु माहिष्मत्यां महाद्युतिः
कर्कोटकसुताञ् जित्वा पुर्यां तस्यां न्यवेशयत् स वै वेगं समुद्रस्य प्रावृट्काले ऽम्बुजेक्षणः
क्रीडन्न् इव भुजोद्भिन्नं प्रतिस्रोतश् चकार ह लुण्ठिता क्रीडता तेन नदी तद्ग्राममालिनी
चलदूर्मिसहस्रेण शङ्किताभ्येति नर्मदा तस्य बाहुसहस्रेण क्षिप्यमाणे महोदधौ
भयान् निलीना निश्चेष्ठाः पातालस्था महीसुराः चूर्णीकृतमहावीचिं चलन्मीनमहातिमिम्
मारुताविद्धफेनौघम् आवर्तक्षोभसंकुलम् प्रावर्तयत् तदा राजा सहस्रेण च बाहुना