सांदीपनिर् असंभाव्यं तयोः कर्मातिमानुषम् विचिन्त्य तौ तदा मेने प्राप्तौ चन्द्रदिवाकरौ
अस्त्रग्रामम् अशेषं च प्रोक्तमात्रम् अवाप्य तौ ऊचतुर् व्रियतां या ते दातव्या गुरुदक्षिणा
सो ऽप्य् अतीन्द्रियम् आलोक्य तयोः कर्म महामतिः अयाचत मृतं पुत्रं प्रभासे लवणार्णवे
गृहीतास्त्रौ ततस् तौ तु गत्वा तं लवणोदधिम् ऊचुतुश् च गुरोः पुत्रो दीयताम् इति सागरम्
कृताञ्जलिपुटश् चाब्धिस् ताव् अथ द्विजसत्तमाः उवाच न मया पुत्रो हृतः सांदीपनेर् इति
दैत्यः पञ्चजनो नाम शङ्खरूपः स बालकम् जग्राह सो ऽस्ति सलिले ममैवासुरसूदन
इत्य् उक्तो ऽन्तर् जलं गत्वा हत्वा पञ्चजनं तथा कृष्णो जग्राह तस्यास्थिप्रभवं शङ्खम् उत्तमम्
यस्य नादेन दैत्यानां बलहानिः प्रजायते देवानां वर्धते तेजो यात्य् अधर्मश् च संक्षयम्
तं पाञ्चजन्यम् आपूर्य गत्वा यमपुरीं हरिः बलदेवश् च बलवाञ् जित्वा वैवस्वतं यमम्
तं बालं यातनासंस्थं यथापूर्वशरीरिणम् पित्रे प्रदत्तवान् कृष्णो बलश् च बलिनां वरः
मथुरां च पुनः प्राप्ताव् उग्रसेनेन पालिताम् प्रहृष्टपुरुषस्त्रीकाव् उभौ रामजनार्दनौ
जरासंधसुते कंस उपयेमे महाबलः अस्तिः प्राप्तिश् च भो विप्रास् तयोर् भर्तृहणं हरिम्
महाबलपरीवारो मागधाधिपतिर् बली हन्तुम् अभ्याययौ कोपाज् जरासंधः सयादवम्
उपेत्य मथुरां सो ऽथ रुरोध मगधेश्वरः अक्षौहिणीभिः सैन्यस्य त्रयोविंशतिभिर् वृतः
निष्क्रम्याल्पपरीवाराव् उभौ रामजनार्दनौ युयुधाते समं तस्य बलिनौ बलिसैनिकैः
ततो बलश् च कृष्णश् च मतिं चक्रे महाबलः आयुधानां पुराणानाम् आदाने मुनिसत्तमाः
अनन्तरं चक्रशार्ङ्गे तूणौ चाप्य् अक्षयौ शरैः आकाशाद् आगतौ वीरौ तदा कौमोदकी गदा
हलं च बलभद्रस्य गगनाद् आगमत् करम् बलस्याभिमतं विप्राः सुनन्दं मुशलं तथा
ततो युद्धे पराजित्य स्वसैन्यं मगधाधिपम् पुरीं विविशतुर् वीराव् उभौ रामजनार्दनौ
जिते तस्मिन् सुदुर्वृत्ते जरासंधे द्विजोत्तमाः जीवमाने गते तत्र कृष्णो मेने न तं जितम्
पुनर् अप्य् आजगामाथ जरासंधो बलान्वितः जितश् च रामकृष्णाभ्याम् अपकृत्य द्विजोत्तमाः
दश चाष्टौ च संग्रामान् एवम् अत्यन्तदुर्मदः यदुभिर् मागधो राजा चक्रे कृष्णपुरोगमैः
सर्वेष्व् एव च युद्धेषु यदुभिः स पराजितः अपक्रान्तो जरासंधः स्वल्पसैन्यैर् बलाधिकः
तद् बलं यादवानां वै रक्षितं यद् अनेकशः तत् तु संनिधिमाहात्म्यं विष्णोर् अंशस्य चक्रिणः
मनुष्यधर्मशीलस्य लीला सा जगतः पतेः अस्त्राण्य् अनेकरूपाणि यद् अरातिषु मुञ्चति
मनसैव जगत्सृष्टिसंहारं तु करोति यः तस्यारिपक्षक्षपणे कियान् उद्यमविस्तरः
तथापि च मनुष्याणां धर्मस् तदनुवर्तनम् कुर्वन् बलवता संधिं हीनैर् युद्धं करोत्य् असौ
साम चोपप्रदानं च तथा भेदं च दर्शयन् करोति दण्डपातं च क्वचिद् एव पलायनम्
मनुष्यदेहिनां चेष्टाम् इत्य् एवम् अनुवर्तते लीला जगत्पतेस् तस्य च्छन्दतः संप्रवर्तते
गार्ग्यं गोष्ठे द्विजो श्यालः षण्ढ इत्य् उक्तवान् द्विजाः यदूनां संनिधौ सर्वे जहसुर् यादवास् तदा