युक्ता मातासीत्यनया नैवेद्यं प्रतिपादयेत्
तस्याः समुद्रेत्यनया उपवीतं निवेदयेत्
ऋग्भिर्वै पंचभिस्तात शृणु चैकमनादृतः
चत्वारि वागिति भवेद्द्वितीया परिकीर्तिता
कृष्णं नियानं हि तथा चतुर्थी परिकीर्तिता
गतेहनामित्यनया अव्यंगं भास्करं न्यसेत्
कृत्वा पूजां ततश्चर्ग्भिरष्टाभिरिति चाच्युत
इत्येष ते मयाख्यातः प्रतिमापूजने विधिः
अनेन विधिना यस्तु सततं पूजयेद्रविम्
पुत्रार्थी लभते पुत्रान्धनार्थी लभते धनम्
निष्कामः पूजयेद्यस्तु स मोक्षं प्राप्नुयान्नरः
ब्रह्मादयस्तथा देवं पूजयित्वा विभावसुम्
महादेवार्चनविधिवर्णनम् येन पूजयते नित्यं महादेवं दिवा करम्
प्रभूतं निर्मलं तेज आराध्य परमं सुखम्
क्रमेण यावदीशानं हृदि बीजं च विन्यसेत्
उपरिष्टात्ततस्तस्य हृदयेन तु पंकजम्
दीप्तादि पूर्वमारभ्य आमहादेवगोचरम्
अबीजैः केसराग्रेषु क्रमेणैव च पूजयेत्
तस्योपहृत्य तं चान्यं वेदितव्यं खपुष्करम्
पाद्यमाचमनं स्थानं वस्त्रगंधादिभूषणम्
कर्तव्यं श्रद्धया भक्त्या एवं तुष्यति भास्करः
आदित्यं पूजयित्वा तु पश्चादंगानि पूजयेत्
दिग्विदिक्षु न्यसेदस्त्रमिंद्रादि दिशोत्तरांतिकम्
पुष्पैर्गंधैश्च धूपैश्च हृदयानि क्रमेण तु
बाह्यतः पूर्वतो मंदं दक्षिणेन बुधं तथा
आग्नेय्यां च कुजं पूज्य नैर्ऋत्यां भानुदेहजम्
इन्द्रादिलोकपालांश्च ततोऽष्टौ पूजयेद्बुधः
क्रमेण पूजयेद्भानुं लोकपालैर्ग्रहैः सह
अनेन विधिना यत्र देवः संपूज्यते रविः
वर्षोपलविषादिभ्यो भयं तत्र न विद्यते