पलाशसमिधं पश्चात्प्रतिष्ठामाहुतित्रयम्
मध्वाज्यगुडमिश्राभिर्लाजाभिर्जुहुयात्पृथक्
स्थालीपाकस्य जुहुयादेकैकामाहुतिं पुनः
वास्तोष्पतय इति मंत्रेण पञ्चगव्यो भवेत्ततः 2.2.20.
वृषान्न इति मंत्रेण कया न इति वै पुनः
इमा रुद्रेति मंत्रेण श्रीश्चेति ऋचा पुनः
तद्विष्णोरिति मंत्रेण तथा पुष्पोदकेन च
पञ्चरक्तेन रक्तानां मृदा कैश्च कुशोदकैः
तैजसैर्मार्त्तिकैश्चापि अष्टाविंशतिभिस्तथा
अन्नं लिप्य ततो मृद्भिर्दद्याच्चैव यथाक्रमम्
ध्वजं च धनुनागेति गंधद्वारेति गोमयम्
सिंधोसीति च सिंदूरं स्वभावे रक्तकं तथा
धाराभिः शतपुष्पाभिर्गन्धतोयादिभिस्तथा
रोचना कुंकुमैर्वापि संलिख्य तत्र पूजयेत् 2.2.20.
मंडपस्योत्तरेदेशे शय्यां निर्माय शोभनाम्
अंगुष्ठमात्रं संस्थाप्य ततः पुष्करिणीमपि
' अंगुष्ठमात्रं सम्पूज्य वरुणाय निवेदयेत्
सुवर्णं राजतं चैव धान्यं वासो वराटकम्
नागयष्टिं समादाय किंचिदुत्तरगां तथा
ततोक्षताय भौमाय कृत्वा चाज्याहुतित्रयम्
क्षीरं च पिष्टकं चैव शष्कुलीगन्धपुष्पकम्
आचार्यो यजमानेन सुसन्नद्धैश्च भृत्यकैः
अवाप्य च ततो यष्टिं स्थिरो भवति वैरिवा
यज्ञप्रियासि देवि त्वं सर्वविघ्नविनाशिनी 2.2.20.
इत्यामंत्र्य यजेच्चैव गायत्रीं च पठेत्ततः
पुनरागत्य तां वेदिं निर्मथ्य वरुणं प्रभुम्
अनिष्टं मार्जयेन्नागानुद्धृत्य कलशं तथा
वरुणं पुष्करिण्यां च जलमध्ये विनिक्षिपेत्
निर्मन्थेत्तत्र यो नागः स्थापयेत्तु यथाविधि
अत्र स्वामी भवान्नाग रक्षणीयस्त्वया जनः