प्रजपेदिन्द्रमग्निं च सोमाय च यथाक्रमम्
भूर्भुवः स्वाहेति तथा तत्र इत्यादिपंचकम्
घृताहुतिं स्विष्टकृच्च द्विजसंस्कारकर्मसु
सर्वौषध्युदकस्नानं करिदंतोत्थमुष्णया
त्रिगन्धं च त्रिशीतं च कुशमूलस्य मृत्तिकाः
यजमानः पुरः कृत्वा दंतकाष्ठपुरःसरम्
' कृत्वा यथोक्तकालेन पूजयेत्तैलधारया 2.2.19.
स्नानमब्दैवतैर्मन्त्रैः सूक्तेन पुरुषेण तु
सुरास्त्वामभिषिंचंतु ब्रह्मन्न विष्णुमहेश्वराः
आखंडलोग्निर्भगवान्यमो वै निर्ऋतिस्तथा
ब्रह्मणा सहितः शेषो दिक्पालाः पातु ते सदा
बुद्धिर्लज्जा वपुः शांतिस्तुष्टिः कांतिश्च मातरः
आदित्यश्चन्द्रमा भौमो बुधजीवसितार्कजाः
देवदानवगंधर्वा यक्षराक्षसपन्नगाः
देवपत्न्यो द्रुमा नागा दैत्याश्चाप्सरसां गणाः
औषधानि च रत्नानि कालस्यावयवाश्च ये
एते त्वामभिषिंचंतु सर्वकामार्थसिद्धये 2.2.19.
गवामष्टोत्तरशतं तदर्धं चाथ विंशतिम्
ततः प्रभाते विमले जले समृवतारयेत्
सामगाय ततो दद्यात्सुवर्णदक्षिणान्विताम्
अच्छेवतेन मन्त्रेण गायत्र्या तदनन्तरम्
पर्वताग्रमृदा तोयनागवल्मीकजातया
पुष्पोदकेन शंखेन तथा रत्नोदकेन च
सुगंधेन त्रिशीतेन विलिप्य च समाहितः
माल्यवस्त्रैरलंकृत्य पूजयेद्गन्धचन्दनैः
पुनस्त्वादिति मंत्रेण पुनः पुष्पं समुत्सृजेत्
कांस्यचक्रस्य मानं तु ऊर्ध्वं यद्द्वादशांगुलम् 2.2.19.
अंगुष्ठहीने लोहस्य तत्र शूलं न कारयेत्
समुत्सृजेच्च प्रासादं तडागं च विशेषतः समुत्सृजेत्ततः पश्चाद्वाक्यमेतदुरीयेत्
ओमित्यादिश्रीकृष्णद्वैपायनाभिधान वेदव्यासप्रणीत भविष्यपुराणोक्त फलप्रप्तिकामश्चतुष्कोणाद्यवच्छिन्नमत्कारितपुष्करिणीजलमेतदूर्जितं गंधपुष्पाद्यर्चितं वरुणदैवतं सर्वसत्त्वेभ्यः स्नानावगाहनार्थमहमुत्सृजे