योगस्थापनदेवप्रतिष्ठापनवर्णनम् देवादिसंस्थापनमा हुरत्र यावन्न सुप्तो मधुसूदनश्च
वारे भृगोर्देवगुरोर्बुधस्य सोमस्य सर्वाः शुभदा भवंति
शुद्धा द्वितीया च तथा तृतीया त्रयोदशी चापि तथैव विप्राः
प्राणप्रतिष्ठा च जलाशयादेरेताः प्रशस्तास्तिथयो भवंति
षडशीतिलोकाप्ययनद्वयेन युगादिके पुण्यादिने शुभे च
सुचारु ईषत्प्रवणे च देशे सुवर्तुलः षोडशहस्तमंडपः
पूर्वादिद्वारेषु चतुष्टयेषु प्लक्षादिभिस्तोरणकैः सुरेशः
ऊर्ध्वे च हस्तानमितानि यानि विचित्रमाल्यांबरभूषितानि
सर्वत्र यागेपि हि मंडपस्य कार्या ध्वजा दिक्षु विदिक्षु शुभ्राः
ध्वजाश्च यस्मिन्दशहस्तसम्मितास्तस्मिन्पताका अपि पञ्चहस्ताः 2.2.18.
द्वारे च तस्मिंश्च निरूपिता वा रंभा सुपुष्पा सुखशाड्वलाश्च
मुंजोद्भवैर्बर्हिसमुद्भवैर्वा सुरंजितश्चेत्त्रितपद्मपल्लवैः
वेदिस्तथा मंडप मध्यभागे कार्या च कोणेस्थितुषादिहीना
वेद्यां परित्यज्य दशांगुलानि ऐशान्यत स्त्रीणि तथा पराणि
प्रासादे च तडागे च महारामे तथैव च
कुंडं चापि प्रकुर्वीत यथाभ्यन्तरमेखलम्
कुंडानि कुर्यान्नव कुंडपक्षे वेद्यास्तथोच्चैरविदिक्षु चैव। सर्वाणि सर्वत्र च मेखलानि षडस्रपंचास्रसमेखलानि
अष्टास्रजान्यब्जत्रिकोणकानि तथार्द्धचन्द्रं चतुरस्रकं च
माल्याम्बराच्छादितपूर्णपाथाः सवृत्तपत्रश्च सुवर्णगर्भः
देवग्रहपूजाविधानवर्णनम् यजमानस्तथा नित्यं कर्म कृत्वा यथाविधि
पंच देवान्नमस्कृत्य तथा यज्ञेश्वरं हरिम्
एतस्मिन्पुण्यदेशे तु फलं गोत्रश्च वै यमः
यथायथा स्वतन्त्रोक्तं पुण्या रण्याभिधायकम्
यथायथा च कल्पोक्तं यथाकुण्डं विधानतः
जलाशयप्रतिष्ठां च करिष्ये विधिवद्द्विजाः
मातृयागं पुरस्कृत्य वृद्धिश्राद्धं समापयेत्
भेर्यादिघोषेण सुमंगलेन पद्यं लिखेदत्र सषोडशाक्षरम्
ब्रह्मेशान्वरयेत्सर्वानाचार्यं तु विशेषतः
नानारत्नैश्च वस्त्रैश्च आचार्यं वरयेद्बुधः 2.2.19.
यथामानं यथाशक्ति यथाभिवृणुयाद्बुधः