किंशुकस्य च पुष्पाणि शस्तं पीतं गुणं भवेत्
कुशीतं गुडकं चैव मंजिष्ठां पंचरंगकम्
पुनर्नवायाः पत्रं च केशरस्य बकस्य च
नागपाषाणकं चैव पुन्नागं दग्धपंचकम् 2.2.2.
कर्पूरं कुंकुमं चैव रोचनारोचनां श्रयेत्
लाक्षां च यदि गृह्णीयात्तद्भर्जित्वा प्रदापयेत्
धरणीं सदनस्थाने पञ्चधा विभजेद्बहिः
तर्जन्यमध्या पूर्वोत्थं विभजेद्वा समाहितः
तृणमारभ्य सामान्ये शक्तो वा मध्यमादितः
अंगुल्यग्रे च विभजेत्सर्वकामार्थसिद्धये
सुभद्रं मण्डलं वक्ष्ये शुभदं शुभमादिशेत्
सार्धहस्तेन मानेन कुर्यान्मंण्डलमुत्तमम्
कर्तुर्मध्यसहस्रस्य मध्यमा मध्यपर्वणि
रेखाद्वयांतरं यच्च मूलरेखां न चाश्रयेत् 2.2.2.
मध्ये निबध्य शंकुं च मुष्टिबाहुप्रमाणतः
प्रकल्प्य कर्णिकादीनि मध्ये चाष्टदलं लिखेत्
पंचमं श्वेतवर्णेन बहिः कुर्यात्त्रिवेष्टनम्
वेष्टयेच्छुक्लवर्णेन मध्ये कल्पलतां लिखेत्
सर्वकार्येषु यज्ञेषु सर्वकल्याणमाप्नुयात्
साधकानां हितार्थाय ईश्वरेणैव भाषितम्
कोणे सूत्रद्वयं दद्यान्मध्ये सूत्रद्वयं पुनः
चतुः सूत्रं पातयेच्च पूर्वापरविभागतः
शतद्वयपदं यावत्षट्पंचाशाधिकं तथा
ऊर्ध्वपंक्त्या पदयुगं चाद्ये पदचतुष्टयम् 2.2.2.
रेखां सर्वत्र शुक्लेन रचयेद्यज्ञियोत्तमः
शक्तियोगे भवेद्रक्तं शैवे पीतं विनिर्दिशेत्
पीतेन कर्णिका कार्या चतुर्भागेन मानतः
कर्णिकामूलमारभ्य रेखाः षोडश कल्पयेत्
अग्रे पीतं भवेदेवं कृत्वा पंकजवेष्टनम्
मध्ये रक्तं भवेत्तच्च एवं षोडशकल्पयेत्