पूज्यते शिवलोके च वस्वादित्यमरुद्गणैः
अकामो यस्त्विमं कुर्याल्लक्षहोमं यथाविधि
पुत्रार्थी लभते पुत्रं धनार्थी लभते धनम्
भ्रष्टराज्यस्तथा राज्यं श्रीकामः श्रियमाप्नुयात्
निष्कामः कुरुते यस्तु परं ब्रह्माधिगच्छति
आचार्य एव होता स्याद्ब्राह्मणानामसंभवे 2.1.20.
दर्भासनेऽतो न कुशे तृणे पत्त्रे त्वचेऽपि च
तत्र दारुमयं कुर्यादागमं भजते द्विजः
द्विजसंस्कारकार्येषु पूर्णादौ चापि दक्षिणा
मण्डलविधिवर्णनम् यदधीना भवेत्सिद्धिस्तस्मात्कुर्यात्समाहितः
देवाः पद्मासनस्थाश्च भविष्यंति वसंति च
अतो मंडलविच्छेदं यस्माद्दशगुणं भवेत्
त्रिशतं वंदने साध्ये सहस्रं च रजोऽष्टकम्
यन्त्रे मणौ शालग्रामे प्रतिमायां विशेषतः
रजोयुक्तं लिखेद्यस्तु पूजाकार्ये विभूतये
चतुरस्रं नवं व्यूहं क्रौंचप्राणं चतु र्विधम्
पारिजातं चंद्रबिंबं सूर्यकांतं च शेखरम्
पंचाब्जं चैव मैनाकं कामराजं च पुष्करम्
चत्वारिंशत्तथा पंचस्वाधिकं परिसंख्यया 2.1.21.
प्रशस्तं चापि गोमेधे क्रौंचं घ्राणं चतुर्विधम्
सर्वत्र सर्वतोभद्रं चतुरस्रं सुभद्रकम्
शक्तानां कामपक्षे च पंचसिंहासनं महत्
सहस्रं शतपत्रं च अन्नदाने तिलाचले
प्रतिष्ठायां सुभद्रं च सर्वतोभद्रमेव च
घटप्रस्थापने चैव गजाह्वं तुरगासनम्
यस्य यज्ञस्य यद्बिंबं तत्तु तेनैव योजयेत्
द्विहस्ता चतुरस्रा च वेदिका परिकीर्तिता
षडंगुला नवव्यूहे वर्धयेद्यज्ञकोविदः
क्रौंचप्राणे तुर्यहस्तं मुष्टिहस्तं समुच्छ्रितम् 2.1.21.
कुर्याद्द्वित्रिक्रमाद्धीनमुच्छ्राये द्विजसत्तमाः