नियोजयेत्प्रतिष्ठायां नित्यनैमित्तिके शृणु
सप्ततेति द्वितीया स्याद्देहिमेति तृतीयिका
उत्थाय दद्यात्पूर्णां तु नोपविश्य कदाचन
ग्रहहोमे शतांते च पूर्णा एका विधीयते
सहस्रांते ददेदेकं पुष्पहोमे च सत्तमाः
मृदुपुष्पाकृतौ त्वेका केवले चेक्षुहोमके 2.1.20.
सीमंतोन्नयने चैव प्रायश्चित्ताकृतीषु च
एवं स्रुचौ समौ कृत्वा उपर्युपरि विन्यसेत्
ऋषिछंदादिकं श्रुत्वा प्रतिमंत्रस्य सत्तमाः
सप्ततेति ब्राह्मणस्य ऋषिः कौंडिन्य ईरितः
देहि मेति च मंत्रस्य प्रजापतिर्ऋषिः स्मृतः
पूर्णा दर्वीति मन्त्रस्य शतक्रतुर्ऋषिः स्मृतः
पुनात्विति च मन्त्रस्य ऋषिः स्यात्पवनः स्मृतः
तुर्यपूर्णा यज्ञमध्ये नकुले द्विजसत्तमाः
ऋत्विक्छंदः स्पृशन्सम्यग्दक्षिणांगमथापि वा
विश्वामित्रोऽयुतं तत्र होमं कुर्याद्विचक्षणः 2.1.20.
नागरंगं धातकीं च पूर्णायां च विवर्जयेत्
तस्मात्प्रागेव सतिलान्गणित्वा स्थापयेत्पृथक्
धातक्याश्च फलैः संख्या कर्तव्या फलमिच्छता
नागरंगफलैरेव धातक्या बकुलैः फलैः
कर्पूरचंदनैः कुर्याद्धोलिकां यज्ञसिद्धये
रक्तगुंजाफलैः संख्यां पुष्टिकामेषु योजयेत्
होता स्यादयुतेनापि एकाहे वेदसंख्यया
लक्षहोमे तु होतारः षडेव परिकीर्तिताः
नव पंच दशदशकं पंचविंशमथापि वा
नवग्रहमखे विप्राश्चत्वारो वेदवेदिनः 2.1.20.
कार्यावयुतहोमे तु न प्रसज्येत विस्तरे
कर्तव्याः शक्तितस्तद्वच्चत्वारोऽपि विमत्सराः
एकमप्यर्चयेद्ब्रह्मा सहस्रे त्वेकब्राह्मणम्
लक्षहोमस्तु कर्तव्यो यदा वित्तं भवेत्तदा