त्रिसूत्रीकरणं पश्चाद्वृत्तसूत्रं निपातयेत्
जिह्वां प्रकल्पयेत्पश्चात्तस्मादग्निं समाहरेत्
नदीपर्वतशालाभ्यः स्त्रीहस्तात्परिवर्जयेत्
तमग्निं प्रतिगृह्णीयादात्मनोऽभिमुखं यथा
वागीश्वरीमृतुस्नातां वागीश्वरसमागताम्
कालबीजेन चैशान्यां योनावग्निं विनिक्षिपेत्
पितृपिङ्गल दहदह पंचयुग्ममुदीर्य च
वह्निबर्हिषि संयुक्ताः सादियांताः सबिंदवः 2.1.15.
जिह्वास्तास्त्रिविधाः प्रोक्ता यज्ञदत्तेन सत्तमाः
त्रिमध्वक्तैर्यत्र होमं कर्णिकायां च होमयेत्
बहुरूपातिरूपा च सात्त्विका योगकर्मसु
लोहितास्यात्करालास्यात्कालीभासस्य इत्यपि
समिद्भेदेषु या जिह्वास्तास्तु तेनैव योजयेत्
त्रिमध्वक्तैर्यथा होमं कर्णिकायां च होमयेत्
बहुरूपा पुष्पहोमे कृष्णा चान्नेन पायसैः ।। इक्षुहोमे पद्मरागा सुवर्णा पद्महोमके
लोहिता पद्महोमे च श्वेता वै बिल्वपत्रके
लोहितास्या पितृहोमे ततो ज्ञेया मनोजवा
समानमाज्यहोमे च निषण्णं शेषवस्तुषु 2.1.15.
कर्णहोमे तु वै व्याधिर्नेत्रे तद्द्वयमीरितम्
पुत्रं विपत्करं चैव तस्मात्तत्र न होमयेत्
प्रवक्ष्यामि विधिं कृत्स्नं यद्विशेषं पुनः शृणु
वक्रा ख्याता महाहोमे कृष्णाभा सा क्रतौ मता
पुष्पपत्रविधौ होमे वह्नेर्जिह्वाः प्रकीर्तिताः
इन्द्रकोष्ठं मस्तकं स्यादीशाग्नेये च मस्तके
अविशिष्टं भवेत्पुच्छं मध्ये चोदरसम्भवम्
हुत्वा व्रीहिगणं तत्र कर्णे पुष्पाहुतिं हुनेत्
श्रवणे चैव नेत्रे च दक्षिणे चेक्षुखंडकम्
मारणे पुष्पदेशे तु न चान्यं होमयेत्क्वचित् 2.1.15.
चन्दनागरुकर्पूरपाटलायूथिकानिभः
प्रदक्षिणस्त्यक्तकल्पा छत्राका शिथिला शिखा