कुर्वीत सम्यगाचम्य तद्वदन्नभुजि क्रियाम्
आचामेत्प्रयतः सम्यक्प्राङ्मुखोदङ्मुखोऽपि वा
तत्सांनिध्ये गृहस्थस्य सिद्धिरत्र परत्र च 4.205.
अर्धेनाहारचरणनित्यनैमित्तिकांतकम्
तत्संसिद्धौ हि सिद्ध्यन्ति धर्मकामादयो नृप
पूर्वाह्न एव कार्याणि देवतानां च पूजनम्
उच्छिष्टोत्सर्जनं दूरात्सदा कार्यं हितैषिणा
नित्योच्छिष्टः संकरकृन्नेहायुर्विंदते महत्
उदक्यादर्शनस्पर्शं कुर्यात्संभाषणं न च
नाधितिष्ठेच्छकृन्मूत्रे केशभस्मकपालिकान्
धारिणो न नमेद्विद्वान्नासनं चापि दापयेत्
कृतांजलिरुपासीत गच्छंतं पृष्ठतोन्वियात्
नामुक्तकेशैर्भोक्तव्यं न नग्नः स्नानमाचरेत् 4.205.
उच्छिष्टो न स्पृशेच्छीर्षं सर्वे प्राणास्तदाश्रयाः
नान्यत्र पुत्र शिष्याभ्यां शिफया ताडनं स्मृतम्
न चाभीक्ष्णं शिरःस्नानं कार्यं निष्कारणं नरैः
न भुक्तोत्तरकालं च न गम्भीरजलाशये
तिलपिष्टं च नाश्नीयात्तथास्यायुर्न हीयते
परीवादं न शृणुयादन्येषामपि जल्पताम्
गारुडानि च रत्नानि बिभृयात्प्रयतो नरः
सिताः सुमनसो हृद्या बिभृयाच्च नरः सदा
प्रियं च नानृतं ब्रूयान्नान्यदोषानुदीरयेत्
न दुष्टयानमारोहेत्कूलच्छाया न संश्रयेत् 4.205.
बंधकीबंधकीभर्तृक्षुद्रानृत कथैः सह
बुधो मैत्रीं न कुर्वीत नैकः पंथानमाश्रयेत् ।। नावगाहेज्जलौघस्य वेगमग्रे नरेश्वरा
प्रदीप्तं वेश्म न विशेन्नारोहेच्छिखरं तरोः
न कुर्याद्दन्तसंवर्षं न कुर्याच्चलनासिकाम्
नोच्चैर्हसेत्सशब्दं च न मुञ्चेत्पवनं बुधः
न श्मश्रु भक्षयेच्चैव न लोष्ठानि च मर्दयेत्
नोच्चासने समासीत गुरोरग्रे कदाचन