स्थाणुवच्च स्थितश्चास्मि नाम चैतद्भविष्यति
ततः क्रुद्धा उमा तेषां देवानां वाक्यमब्रवीत्
यस्मात्तस्माद्भवंतोऽपि न पुत्राञ्जनयिष्यथ
दत्त्वा शापं ततो देवी देवानामाह शंकरम् 4.178.
अपुत्रस्य गतिर्नास्ति इतीयं श्रूयते श्रुतिः
सौवर्णस्तेन दातव्यः कल्पवृक्षो गुणान्वितः
कृत्रिमं वापि गृह्णीयाद्वृक्षं वा स्थावरादिकम्
तेन पुत्रवतां लोका देवि तस्य न संशयः
बहुशाखः सुवर्णांगोप्यनेककुसुमान्वितः
फलानि तस्य दिव्यानि सौवर्णानि प्रकल्पयेत्
दानमेतत्प्रदातव्यं राजतं चैवमुत्तमम्
चतुष्कोणेषु कुर्वीत चतुरः कांचनद्रुमान्
सहस्रेण तदर्द्धेन तस्याप्यर्द्धेन वा पुनः
प्रागुदक्प्रवणे देशे मंडपं तत्र कारयेत् 4.178.
हस्तमात्रप्रमाणेन कुंडमेकं सुशोभनम्
तत्र वै ब्राह्मणा योज्या ऋग्यजुःसामपाठकाः
सर्वाभरणसंपन्नास्ताम्रपत्रद्वयान्विताः
गुडप्रस्थोपरिष्टाच्च स्थापयेत्कल्पपादपम्
कामदेवमधस्ताच्च सकलत्र प्रयोजयेत्
मंदारं दक्षिणे पार्श्वे श्रिया सह तथा घृते
सुरभीसंयुतं तद्वत्तिलेषु हरिचंदनम्
तथाष्टौ पूर्णकलशान्समंतात्परिकल्पयेत्
धान्यानि चैव सर्वाणि समंतात्परिकल्पयेत्
दीपमाला विचित्राश्च ज्वालयेत समंततः 4.178.
कामदस्त्वं हि देवानां कामवृक्षस्ततः स्मृतः
एवं संपूज्य विधिना जागरं तत्र कारयेत्
होमं च ब्राह्मणाः कुर्युर्मद्गतेनांतरात्मना
तल्लिंगैः स्थापितान्देवान्होमेनाप्याययेत्ततः
अयुतेन भवेत्सिद्धिर्यज्ञस्य वरवर्णिनि
दद्यात्पर्वसमीपे तु कल्पवृक्षं सद क्षिणम्