प्रयागे नैमिषे चैव कुरुक्षेत्रे तथार्बुदे
पुण्यनद्यश्च दानेस्मिन्प्रशस्ताः स्युर्न संशयः
आरामे वा तडागे वा शुचौ देशे विधानतः
हस्ता द्वादश कर्तव्यं मंडपं तु सुशोभनम्
तन्मध्ये वेदिकां कुर्यात्पंचहस्तामलकृताम्
हिरण्यगर्भं तन्मध्ये प्रथमेऽहनि कल्पयेत्
शिल्पिनं पूजयेत्पूर्वं वासोभिर्भूषणैस्तथा 4.176.
सुवर्णेन संशुद्धेन शक्तितः कारयेद्बुधः
त्रिभागहीनं वदने मूले तस्यार्द्धविस्तरम्
पिधानमुपरिष्टाच्च कर्तव्यं चांगुलाधिकम्
दात्रं सपट्टिकं चैव सर्वोपस्करणान्वितम्
पार्श्वतः स्थापयेत्तस्य हेमदंडकमंडलू
एवं लक्षणसंयुक्तं कृत्वा गर्भं विचक्षणः
हस्तिना शकटेनाथ राजन्ब्रह्मरथेन वा
तिलद्रोणोपरिगतं वेदीमध्येऽधिवासयेत्
कौशेयवाससी शुभ्रे ततस्तं परिधापयेत्
धूपैः सुधूपितं कृत्वा मंत्रमेतमुदीरयेत् 4.176.
ब्रह्मादयस्तथा देवा नमस्ते भुवनोद्भव
नमो हिरण्यगर्भाय गर्भे यस्य पितामहः
वेद्याश्चतुर्दिशं चैव कुंडानि परिकल्पयेत्
चतुश्चारणिकास्तत्र ब्राह्मणा मंत्रपारगाः
सर्वाभरणसंपन्नाः सर्वे चाहतवाससः
वेद्याः पूर्वोत्तरे भागे ग्रहवेदिं प्रकल्पयेत्
पूजयेत्स्वर्णघटितान्पुष्पधूपविलेपनैः
कुंभद्वयं च द्वारेषु स्थापयेद्रत्नसंयुतम्
पालाश्यः समिधस्तत्र प्रशस्ता होमकर्मणि
स्वलिंगैर्होमयेत्पूर्वं मंत्रैर्व्याहृतिभिः पुमान् 4.176.
यजमानस्ततः स्नात्वा शुक्लांबरधरः शुचिः
नमो हिरण्यगर्भाय विश्वगर्भाय वै नमः
मात्राहं जनितः पूर्व मर्त्यधर्मासुरोत्तम