कृत्तिकासु यदा कश्चिद्व्याधिं संप्रतिपद्यते
मृगशीर्षे पञ्चरात्रमार्द्रा प्राणवियोजिनी
नवरात्रं तथाश्लेषा श्मशानांतं मघासु च
हस्ते च तनु दृश्येत चित्रायां त्वर्द्धमास कम्
मासद्वयं तथा स्वातौ विशाखा विंशतिर्दिनाः
मूलेन जायते मोक्षश्चाषाढासु त्रिपञ्चकम्
धनिष्ठायामर्द्धमासं वारुणे तु दशाहकैः 4.145.
रेवती दशरात्रं तु अहोरात्रं तथाश्विनी
कौशिकेन समादिष्टो नक्षत्रव्याधिसंभवः
क्षीरवृक्षस्य समिधो जुहुयादश्वदैवते
प्राजापत्ये तु जुहुयाद्भोग्यबीजकरं बकम्
आदित्ये च प्रयत्नेन घृताक्ताः सिततंडुलाः
ग्राम्योषधैर्वटपत्रैः सर्पिः सर्पाधिदैवते
सावित्रे दधिहोमोत्र त्वाष्ट्रं चित्रौदनं हविः
यवान्सहाज्येन हुनेद्रौद्रेऽग्नौ तु पयोदनम्
नैर्ऋत्ये तिलहोमः स्यादव्यक्ते च हुताशने
रक्ताश्च तंडुलाश्चैव होतव्या विष्णुदैवते 4.145.
अजैकपादे नक्षत्रे प्राजापत्येन तत्समम्
रक्ताश्च तण्डुलाश्चैव होतव्या विष्णुदैवते
सावित्री होममेकं तु ब्रह्माभिहितवान्पुरा
इति श्रीभविष्ये महापुराण उत्तरपर्वणि श्रीकृष्णयुधिष्ठिरसंवादे नक्षत्रहोमविधिवर्णनं नाम पंच चत्वारिंशदुत्तरशततमोऽध्यायः
अपराधशतव्रतवर्णनम् अपराधशतं येन क्षयं याति शृणुष्व तत्
कः पूज्यते च वै तस्मिन्कदा वा क्रियते नरैः
शृणु राजन्महाबाहो अपराधशतव्रतम्
प्रायश्चित्तान्यशेषाणि सर्वपापापनुत्तये
पापं गुरुतरं चापि दह्यते तूलराशिवत्
न करोति नरो मोहाद्व्रतमेतद्दिनेदिने
अदातृत्वमशौचं च निर्दयत्वं स्पृहालुता
क्षतव्रतत्वं नास्तिक्यं वेदनिंदा कठोरता
मनसोऽनिग्रहश्चैव क्रोध ईर्ष्याथ मत्सरः