गोषु यज्ञाः प्रवर्तंते गोषु देवाः प्रतिष्ठिताः
शृङ्गमूले गवां नित्यं ब्रह्मा विष्णुश्च संस्थितौ
शिवो मध्ये महादेवः सर्वकारणकारणम्
कंबलाश्वतरौ नागौ नासापुटसमाश्रितौ
दंतेषु वसवः सर्वे जिह्वायां वरुणः स्थितः
संध्याद्वयं तथेष्टाभ्यां ग्रीवायां च पुरंदरः
चतुष्पात्सकलो धर्मो नित्यं जंघासु तिष्ठति 4.69.
खुराणां पश्चिमे भागे राक्षसाः संप्रतिष्ठिताः
श्रोणीतटस्थाः पितरः कपोलेषु च मानवाः
आदित्या रश्मयो वालाः पिण्डीभूता व्यवस्थिताः
त्रयस्त्रिंशद्देवकोट्यो रोमकूपे व्यवस्थिताः
चत्वारः सागराः प्रोक्ता गवां ये तु पयोधराः
जठरे गार्हपत्योऽग्निर्दक्षिणाग्निर्हृदिस्थितः
अस्थिव्यवस्थिताः शैला मज्जासु क्रतवः स्थिताः
सुरक्तपीतकृष्णादौ गवां वर्णे व्यवस्थिताः
संस्मृत्य तत्क्षणाद्गौरी इयेष सदृशीं तनुम्
षडुन्नतां पञ्चनिम्नां मंडूकाक्षीं सुवालधिम् 4.69.
सुशीलां च सुतस्नेहां सुक्षीरां सुपयोधराम्
चर्यया प्रतरन्हृष्टो महादेवः स्वचेतसि
दत्त्वा कुलपतेः पार्श्वं भृगोस्तां गां न्यवेदयत्
न्यासरूपां ददौ धेनुं रक्षित्वा तां दिनद्वयम्
अन्तर्द्धिमगमद्देवः पुनर्व्याघ्रो बभूव ह
वज्रचक्रनखो देवीं ज्वलत्पिंगललोचनः
संप्रायादाश्रमपदं तां च धेनुं सवत्सिकाम्
हाहेत्युच्चैः केचिदूचुर्हुंहुंकारैस्तथापरे
तालास्फोटान्ददुः केचिद्व्याघ्रं दृष्ट्वातिभैरवम्
तस्या व्याघ्रभयार्तायाः कपिलाया युधिष्ठिर 4.69.
व्याघ्रवत्सकयोस्तत्र वंदितं सुरकिन्नरैः
सजलं शिवलिंगं च शम्भोस्तीर्थं तदुत्तमम्
तत्र स्नात्वा महातीर्थे जंबूमार्गे नराधिप