तस्य दारक्रियां तात चिकीर्षुरहमप्युत । अनुरूपादिव कुलादित्येव च मनो दधे
तथाऽश्रौषं महाबाहो तिस्रः कन्याः स्वयंवरे । रूपेणाप्रतिमाः सर्वाः काशिराजसुतास्तदा । अम्बां चैवाम्बिकां चैव तथैवाम्बालिकामपि
राजानश्च समाहूताः पृथिव्यां भरतर्षभ। अम्बा ज्येष्ठाभवत्तासामम्बिका त्वथ मध्यमा
अम्बालिका च राजेन्द्र राजकन्या यवीयसी । सोऽहमेकरथेनैव गतः काशिपतेः पुरीम्
अपश्यं ता महाबाहो तिस्रः कन्याः स्वलङ्कृताः। राज्ञश्चैव समाहूतान्पार्थिवान्पृथिवीपते
ततोऽहं तान्नृपान्सर्वानाहूय समरे स्थितान्। रथमारोपयाञ्चक्रे कन्यास्ता भरतर्षभ
वीर्यशुल्काश्च ता ज्ञात्वा समारोप्य रथं तदा। अवोचं पार्थिवान्सर्वानहं तत्र समागतान्। भीष्मः शान्तनवः कन्या हरतीति पुनःपुनः
ते यतध्वं परं शक्त्या सर्वे मोक्षाय पार्थिवाः । प्रसह्य हि हराम्येष मिषतां वो नरर्षभाः
ततस्ते पृथिवीपालाः समुत्पतुरुदायुधाः । योगो योग इति क्रुद्धाः सारथीनभ्यचोदयन्
ते रथैर्गसङ्काशैर्गजैश्च गजयोधिनः। पुष्टैश्वाश्वैर्महीपालाः समुत्पेतुरुदायुधाः
ततस्ते मां महीपालाः सर्व एव विशां पते। रथव्रातेन महता सर्वतः पर्यवारयन्
तानहं शरवर्षेण समन्तात्पर्यवारयम् । सर्वान्नृपांश्चाप्यजयं देवराडिव दानवान्
अपातयं शरैर्दीप्तैः प्रहसन्भरतर्षभ । तेषामापततां चित्रान्ध्वजान्हेमपरिष्कृतान्
एकैकेन हि बाणेन भूमौ पातितवानहम् । हयांस्तेषां गजांश्चैव सारथींश्चाप्यहं रणे
ते निवृत्ताश्च भग्नाश्च दृष्ट्वा तल्लाघवं मम। `प्रणिपेतुश्च सर्वे वै प्रशशंसुश्च पार्थिवाः
तत आदाय ताः कन्या नृपतींश्च विसृज्य तान्।' अथाऽहं हास्तिनपुरमायां जित्वा महीक्षितः
ततोऽहं ताश्च कन्या वै भ्रातुरर्थाय भारत। तच्च कर्म महाबाहो सत्यवत्यै न्यवेदयम्
ततोऽहं भरतश्रेष्ठ मातरं वीरमातरम् । अभिगम्योपसंगृह्य दाशेयीमिदमब्रुवम्
इमाः काशिपतेः कन्या मया निर्जित्य पार्थिवान् । विचित्रवीर्यस्य कृते वीर्यशुल्का हृता इति
ततो मूर्धन्युपाघ्राय पर्यश्रुनयना नृप। आह सत्यवती हृष्टा दिष्ट्या पुत्र जितं त्वया
सत्यवत्यास्त्वनुमते विवाहे समुपस्थिते। उवाच वाक्यं सव्रीडा ज्येष्ठा काशिपतेः सुता
भीष्म त्वमसि धर्मज्ञः सर्वशास्त्रविशारदः । श्रुत्वा च वचनं धर्म्यं मह्यं कर्तुमिहार्हसि
मया साल्वपत्तिः पूर्वं मनसाऽभिवृतो वरः। तेन चास्मि वृता पूर्वं रहस्यविदिते पितुः
कथं मामन्यकामां त्वं राजधर्ममतीत्य वै । वासयेथा गृहे भीष्म कौरवः सन्विशेषतः
एतद्बुद्ध्या विनिश्चित्य मनसा भरतर्षभ । यत्क्षमं ते महाबाहो तदिहारब्धुमर्हसि
स मां प्रतीक्षते व्यक्तं साल्वराजो विशांपते । तस्मान्मां त्वं कुरुश्रेष्ठ समनुज्ञातुमर्हसि
कृपां कुरु महाबाहो मयि धर्मभृतां वर। त्वं हि सत्यव्रतो वीर पृथिव्यामिति नः श्रुतम्
ततोऽहं समनुज्ञाप्य कालीं गन्धवतीं तदा। मन्त्रिणश्चर्त्विजश्चैव तथैव च पुरोहितान्। समनुज्ञामिषं कन्यामम्बां ज्येष्ठां नराधिप
अनुज्ञाता ययौ सा तु कन्या साल्वपतेः पुरम्। वृद्धैर्द्विजातिभिर्गुप्ता धात्र्या चानुगता तदा
अतीत्य च तमध्वानमासमाद नराधिपम । सा तमासाद्य राजानं साल्वं वचनमब्रवीत्