कृपः शारद्वतो रजन्रथयूथपयूथपः। प्रियान्प्राणान्परित्यज्य प्रधक्ष्यति रिपूंस्तव
गौतमस्य महर्षेर्य आचार्यस्य शरद्वतः। कार्तिकेय इवाजयः शरस्तम्बात्सुतोऽभवत्
एष सेनाः सुबहुला विविधायुधकार्मुकाः । अग्निवत्समरे तात चरिष्यति विनिर्दहन्
शकुनिर्मातुलस्तेऽसौ रथ एको नराधिप। प्रयुज्य पाण्डवैर्वैरं योत्स्यते नात्र संशयः
एतस्य सेना दुर्धर्षा समरे प्रतियायिनः। विकृतायुधभूयिष्ठा वायुवेगसमा जवे
द्रोणपुत्रो महेष्वासः सर्वानेवातिधन्विनः । समरे चित्रयोधी च दृढास्त्रश्च महारथः
एतस्य हि महाराज यथा गाण्डीवधन्वनः। शरासनविनिर्मुक्ताः संसक्ता यान्ति सायकाः
नैष शक्यो मया वीरः संख्यातुं रथसत्तमः । निर्दहेदपि लोकांस्त्रीनिच्छन्नेष महारथः
क्रोधस्तेजश्च तपसा संभृतोश्रमवासिनाम् । द्रोणेनानुगृहीतश्च दिव्यैरस्त्रैरुदारधीः
दोषस्त्वस्य महानेको येनैव भरतर्षभ । न मे रथो नातिरथो मतः पार्थिवसत्तम
जीवितं प्रियमत्यर्थमायुष्कामः सदा द्विजः । न ह्यस्य सदृशः कश्चिदुभयोः सेनयोरपि
हन्यादेकरथेनैव देवानामपि वाहिनीम् । वपुष्मांस्तलघोषेण स्फोटयेदपि पर्वतान्
असंख्येयगुणो वीरः प्रहन्ता दारुणद्युतिः। दण्डपाणिरिवासह्यः कालवत्प्रचरिष्यति
युगान्ताग्निसमः क्रोधात्सिंहग्रीवो महाद्युतिः । एष भारत युद्धस्य पृष्ठं संशयमिष्यति
पिता त्वस्य महातेजा वृद्धोऽपि युवभिर्वरः । रणे कर्म महत्कर्ता अत्र मे नास्ति संशयः
अस्त्रवेगानिलोद्भूतः सेनाकक्षेन्धनोत्थितः । पाण्डुपुत्रस्य सैन्यानि प्रधक्ष्यति रणे धृतः
रथयूथपयूथानां यूथपोऽय नरर्षभः । भरद्वाजात्मजः कर्ता कर्म तीव्रं हितं तव
सर्वमूर्धाभिषिक्तानामाचार्यः स्थविरो गुरुः । गच्छेदन्तं सृञ्जयानां प्रियस्त्वस्य धनञ्जयः
नैष जातु महेष्वासः पार्थमक्लिष्टकारिणम् । हन्यादाचार्यकं दीप्तं संस्मृत्य गुणनिर्जितम्
श्लाघते यं सदा वीर पार्थस्य गुणविस्तरैः । पुत्रादभ्यधिकं चैनं भारद्वाजोऽनुपश्यति
हन्यादेकरथेनैव देवगन्धर्वमानुषान् । एकीभूतानपि रणे दिव्यैरस्त्रैः प्रतापवान्
पौरवो राजशार्दूलस्तव राजन्महारथः । मतो मम रथोदारः परवीररथारुजः
स्वेन सैन्येन महता प्रतपञ्शत्रुवाहिनीम्। प्रधक्ष्यति स पाञ्चालान्कक्षमग्निगतिर्यथा
सत्यश्रवा रथस्त्वेको राजपुत्रो बृहद्बलः। तव राजन्रिपुबले कालवत्प्रचरिष्यति
एतस्य योधा राजेन्द्र विचित्रकवचायुधाः । विचरिष्यन्ति सङ्ग्रामे निन्घन्तः शास्त्रवांस्तव
वृषसेनो रथस्तेऽग्र्यः कर्णपुत्रो महारथः । प्रधक्ष्यति रिपूणां ते बलं तु बलिनां वरः
जघसन्धो महातेजा राजन्रथवरस्तव । त्यक्ष्यते समरे प्राणान्माधवः परवीरहा
एष योत्स्यति सङ्ग्रामे गजस्कन्धविशारदः । रथेन वा माहबाहुः क्षपयञ्शत्रुवाहिनीम्
रथ एष महाराज मतो मे राजसत्तम। त्वदर्थे त्यक्ष्यते प्राणान्सहसैन्यो महारणे
एष विक्रान्तयोधी च चित्रयोधी च संगरे । वीतभीश्चापि ते राजञ्शत्रुभिः सह योत्स्यते