वयस्यत्वात्तु ते सर्वमपराधमिमं क्षमे। नेदृशीं प्रवदर्वाचं यदि जीवितुमिच्छसि
ततोऽब्रवीत्पुनः कङ्कः प्रहस्य कुरुवर्धनः । बृहन्नलाया सजेन्द्र धुष्यतां नगरे जयः
उत्तरेण तु सारथ्यं कृतं नूनं भविष्यति। निमित्तं किंचिदुत्पन्नं तर्कश्चापि दृढो मम। यतो जानामि राजेन्द्र नान्यथा तद्भविष्यति
कुरवोऽपि महावीर्या देवैरपि सुदुर्जयाः। ससोमवरुणादित्यैः सयक्षेशहुताशनैः
यत्र शान्तनवो भीष्मो द्रोणकर्णौ सुदुर्जयौ। अश्वत्थामा विकर्णश्च सोमदत्तो जयद्रथः
भूरिश्रवाः शलो भूरिर्जलसन्धिश्च वीर्यवान्। दुर्योधनो दुष्प्रसहो दुःशासनविविंशती
वृषसेनोऽश्ववेगश्च वायुवेगसुवर्चसौ । बाह्लीकः शूरसेनश्च युयुत्सुश्च परन्तपः
सौबलः शकुनिश्चैव द्युमत्सेनश्च साल्वराट् । अन्ये च बहवः शूरा नानाजनपदेश्वराः
कृपेणाचार्यमुख्येन सहिताः कुरवो नृपाः। सञ्जकार्मुकनिस्त्रिंशा रथिनो रथयूथपाः। अन्ये चैव महावीर्या राजपुत्रा महारथाः
मरुद्गणैः परिवृतः साक्षादपि पुरंदरः । तद्बलं न जयेत्क्रुद्धो भीष्मद्रोणादिभिर्वृतम्
कस्तद्बृहन्नलादन्यो मनुष्यः प्रतियोत्स्यति। यस्य बाहुबले तुल्यो न भविष्यति कश्चन
अतीव समरं दृष्ट्वा हर्षो यस्याभिवर्धते। किमेवं पुरुषो लोको दिवि वा भुवि विद्यते
तेन संक्षुभितो राजा दीर्यमाणेन चेतसा । अब्रवीद्वचनं क्रूरमजानन्वै युधिष्ठिरम्
कङ्ख मा ब्रूहि मे वाक्यं प्रतिकूलं द्विजोत्तम । बहुशः प्रतिषिद्धस्त्वं न च वाचं नियच्छसि
नियन्ता चेन्न विद्येत न कश्चिद्धर्ममाचरेत्। इति प्रक्षुभितो राजा सोऽक्षेणाभ्यहनद्भृशम्
तस्य तक्षकभोगाभं बाहुमुत्क्षिप्य दक्षिणम्। विराटः प्राहनत्क्रुद्धः कर्णमाश्रित्य दक्षिणम्
मुखे युधिष्ठिरं कोपान्मैवमित्यवभर्त्सयन्। बलवत्प्रतिविद्धस्य नस्तः शोणितमास्रवत्
अक्षेणाभिहतो राजा विराटेन युधिष्ठिरः । तूष्णीमासीन्महाबाहुः कृष्णां पश्यन्सुदुःखिताम्
तस्य रक्तोत्पलनिभं शिरसः शोणितं तदा। प्रावर्तत महाबाहोरभिघातान्महात्मनः
तदप्राप्तं महीं पार्थः पाणिभ्यां समधारयत्। अवैक्षत च धर्मात्मा द्रौपदीं पार्श्वतः स्थिताम्
सा वेदनामभिज्ञाय भर्तुश्चित्तवशानुगा। सा विषण्णा च भीता च क्रुद्धा च द्रुपदात्मजा
बाष्पं नियम्य कृच्छ्रेण भर्तुर्निःश्रेयसैषिणी । उत्तरीयेण सूक्ष्मेण तूर्णं जग्राह शोणितम्
निगृह्य रक्तं वस्त्रेण सैरन्ध्री दुःखमोहिता। सौवर्णं गृह्य भृङ्गारं शोणितं तदपामृजत् । युधिष्ठिरस्य राजेन्द्र द्रुपदेन्द्रसुता तदा
सैरन्ध्रि किमिदं रक्तमुत्तरीयेण गृह्यते। कोत्र हेतुर्विशालाक्षि तन्मप्राचक्ष्व तत्वतः
रक्तबिन्दनि यावन्ति कङ्कस्य धरणीतले। तावद्वर्षाणि राष्ट्रे ते अनावृष्टिर्भविष्यति
एतन्निमित्तं मात्स्येन्द्र कङ्कस्य रुधिरं मया। गृहीतमुत्तरीयेण विनाशो मा भवेत्तव
यतीशं यो विहन्येत तस्यायुर्विनशिष्यति। यो यतीशं नियम्येत सहस्रं यातना यमे
यतौ रक्तं दर्शयति यावत्पांसुरगृह्यत। तावन्तः पितृलोकस्थाः पितरः प्रपतन्त्यधः
इति ज्ञात्वा विराटेन्द्र धृतं रक्तं च वाससा। मया तव हितार्थाय त्वयि प्रणयकारणात्
युद्धं तु मानुषं द्रष्टुमागतास्त्रिदशाः पुरा। किमकुर्वन्त ते पश्चात्कथयस्व ममानघ