लब्ध्वा तु संज्ञां पुरुषप्रवीरः पार्थं निरीक्ष्याथ महेन्द्रकल्पम् । रणात्प्रमुक्तं पुरुषप्रवीरं स धार्तराष्ट्रस्त्वरितो बभाषे
अयं कथंचिद्भवतो विमुक्तस्तं वै प्रबध्नीत यथा न मुच्येत्। तमब्रवीच्छान्तनवः प्रहस्य क्व ते गता बुद्धिरभूत्क्क वीर्यम्
शान्तिं परां प्राप्य यथा स्थितस्त्वमुत्सृज्य बाणांश्च धनुश्च चित्रम् । न त्वेव बीभत्सुरलं नृशंसं कर्तुं न पापेऽस्य मनो निविष्टम्
जह्यान्न धर्मं त्रिदिवस्य हेतोः सर्वे तु तस्मान्न हता रणेऽस्मिन्। क्षिप्रं कुरून्याहि कुरुप्रवीर विजित्य गाश्च प्रतियातु पार्थः
संमोहनास्त्रप्रतिमोहिताः स्थ यूयं न जानीथ धनापहारम्। पश्यामि वस्त्राभरणानि राजन्विराटपुत्रेण समाहृतानि
नृपेषु सर्वेषु च मोहितेषु हन्तुं यदीच्छेत्स हनिष्यतीति। तदा तु धर्मात्मतया नृवीरो न चाहनद्वो बलभित्तनूजः
भाग्येन युष्मानवधीन्न पार्थः संधिं कुरूणामनुमन्यमानः । तद्यात यूयं सहसैनिकैस्तैर्हतावशिष्टैर्गजसाह्वयं पुरुम्
दुर्योधनस्तस्य निशम्य वाक्यं पितामहस्यात्महितं प्रशस्य। अतीतकामो युधि सोऽत्यमर्षी राजा विनिश्वस्य बभूव तूष्णीम्
तद्भीष्मवाक्यं हि निशम्य सर्वे धनञ्जयाग्निं च विवर्धमानम्। निवर्तनायैव मतिं निदध्युर्दुर्योधनं तं परिरक्षमाणाः
तान्प्रस्थितान्प्रीतमनाः समर्थो धनञ्जयः सर्वकुरुप्रवीरः । आमन्त्र्य वीरोऽनुययौ मुहूर्तं गाण्डीवघोषेण विनद्य लोकम्
तेषामनीकानि निरीक्ष्य पार्थो विकीर्णयानध्वजकार्मुकाणि। गाण्डीवधन्वा प्रहसन्कुरूणां शङ्ख प्रदध्मौ बलवान्बलेन
ते शङ्खशब्दं तुमुलं निशम्य ध्वजस्य शब्दं च ततोऽन्तरिक्षे। गाण्डीवशब्देन मुहुर्मुहुस्ते भीता ययुः सर्वधनं विहाय
तानर्जुनो दूरतरं विभज्य धनं च सर्वं निखिलं निवर्त्य । आपृच्छ्य तान्दूरमनुप्रयात्वा धनञ्जयस्तत्र कुरून्महात्मा। गुरूंश्च सर्वानभिवाद्य बाणैर्न्यवर्ततोदग्रमनाः शरैः सह
पितामहं शान्तनवं महात्मा द्वाभ्यां शराभ्यामभिवाद्य वीरः। द्रोणं कृपं चैव कुरूंश्च मान्याञ्शरैश्च सर्वानभिवाद्य सङ्ख्ये। दुर्योधनस्योत्तमरत्नचित्रं चिच्छेद पार्थो मकुटं शरौघैः
अराजवंशस्य किमर्थमेतन्नित्यं न धार्यं मकुटं त्वयेति। संपातितं भूमितले सरत्नं प्रीतस्तुतो मात्स्यसुतो बभूव
धनञ्जयं नागमिव प्रभिन्नं विजित्य शत्रून्परिवर्तमानम्। गास्ता विजित्याभिमुखं प्रयान्तं न शक्नुवन्तः कुरवः प्रयाताः
धनञ्जयं सिंहमिवात्तशस्त्रं गा वै विजित्याभिमुखं प्रयान्तम् । उदीक्षितुं पार्थिवास्ते न शेकुर्यथैव मध्याह्नगतं हि सूर्यम्
रक्तानि वासांसि च तानि गृह्य रणोत्कटो नाग इव प्रभिन्नः। जित्वा च वैराटिमुवाच पार्थः प्रहृष्टरूपो रथिनां वरिष्ठः
आवर्तयाश्वान्पशवो जितास्ते याताः परे प्रैहि पुरं प्रहृष्टः । उद्धुष्यतां ते विजयोऽद्य शीघ्रं गात्रं तु ते सेवतु माल्यगन्धः । माता तु ते नन्दतु बान्धवाश्च त्वामद्य दृष्ट्वा समुदीर्णहर्षम्
ततो विजित्य संग्रामे कुरुगोवृषभेक्षणः। समानयामास तदा विराटस्य धनं महत्
मतषु च प्रभग्नेषु धार्तराष्ट्रेषु सर्वशः। वनान्निष्क्रम्य गहनाद्बहवः कुरुसैनिकाः । भयात्संत्रस्तमनसः समाजग्मुस्ततस्ततः
मुक्तकेशाः प्रदृश्यन्ते स्थिताः प्राञ्जलयस्तदा। क्षुत्पिणसापरिश्रान्ता विदेशस्था विचेतसः । ऊचुः प्राञ्जलयः सर्वे पार्थ किं करवामहे
प्राणानन्तर्मनोयातान्प्रयाचिष्यामहे वयम्। वयं चार्जुन ते दासा ह्यनुरक्ष्या ह्यनाथकाः
अनाथान्दुःखितान्दीनान्कृशान्वृद्धान्पराजितान्। न्यस्तशस्त्रान्निराशांश्च नाहं हन्मि कृताञ्जलीन्
भवन्तो यान्तु विस्रब्धा निर्भया अमृता यथा। मम पादरजोलक्ष्म्या जीवन्तु सुचिरं भुवि
तस्य तामभयां वाचं श्रुत्वा योधाः समागताः । आयुः कीर्तियशोभिस्ते तमाशीर्भिरवर्धयन्
ततो निवृत्ताः कुरवो यग्नाश्च दिवमास्थिताः । प्रयाताः सर्वतस्तत्र नमस्कृत्य धनञ्जयम्
एवं दत्ताभयास्तेन ततो याताः कुरून्प्रति
स कर्म कृत्वा परमार्यकर्मा निहत्य शत्रून्द्विषतां निहन्ता। यातो महामेघ इवातपान्ते विद्राव्य पार्थः कुरुसैन्यमेकः
तं मात्स्यपुत्रं द्विषतां निहन्ता वचोऽब्रवीत्संपरिगृह्य राजन्