एतस्मिन्नन्तरे पार्थं न मूढात्मा व्यजानत। विराटपुत्रः प्रभुखे पप्रच्छ पुनरेव तम्
सुवर्णरुचिराण्येषामायुधानि महात्मनाम् । रुचिराणि प्रकाशन्ते पार्थानामाशुकारिणाम्
क्वनु ते पाण्डवाः शूराः संग्रामेष्वपराजिताः। येषामिमानि दीप्तानि श्रिया दीप्यन्ति भान्ति च
कस्मिन्वसन्ति देशे च धर्मज्ञा बन्धुवत्सलाः। क्व धर्मराजः कौन्तेयो धर्मपुत्रो युधिष्ठिरः
धर्मशीलश्च धर्मात्मा धर्मवान्धर्मवित्सुधीः । धर्माध्यक्षो धर्मपुत्रो धर्मज्ञो धर्ममूर्तिमान्
धर्मनिष्ठो धर्मकर्ता धर्मगोप्ता सुधर्मकृत्। सत्यार्जवक्षमाधारो घृणी धर्मपरायणः
भीमसेनार्जुनौ चापि सर्वे ते मातुला मम। नकुलः सहदेवो वा सर्वास्त्रकुशलौ रणे
सर्व एव महात्मानः सर्वामित्रविनाशनाः। राज्यमक्षैः पराजित्य नः श्रूयन्ते वनं गताः
द्रौपदी चापि पाञ्चाली स्त्रीरत्नमिति मे श्रुता। जिता चाक्षैस्तदा कृष्णा तानेवान्वगमद्वने
उत्सृज्य राज्यं धर्म्यं ते नः श्रूयन्ते वनं गताः
पाण्डवान्यदि जानीषे क्वनु ते धर्मचारिणः । क्वनु वा निवसन्तीति सत्यं ब्रूहि बृहन्नले
किमर्थमागतान्यत्र शस्त्रास्त्राणि महात्मनाम्। कथं ज्ञातानि भवता तथा मे ब्रूहि शोभने
ततः प्रहस्य बीभत्सुः कौन्तेयः श्वेतवाहनः। उवाच राजपुत्रं तमुत्तरं शृणु मे वचः
मा भैस्त्वं राजशार्दूल सर्वं ते वर्णयाम्यहम् । नात्र भेतव्यमद्यापि राजपुत्र यथातथा
वयं ते पाण्डवा नाम वनवासस्य पारगाः। अतीते द्वादशे वर्षे च्छन्नवासमिहोषिताः। तस्मादशङ्कितमनाः शृणुष्वावहितोत्तर
अहमस्म्यर्जुनो नाम कङ्को नाम युधिष्ठिरः। भीमसेनस्तु वललः पितुस्ते रसपाचकः। अश्वबन्धस्तु नकुलः सहदेवस्तु गोपतिः
सैरन्ध्रीं द्रौपदीं विद्धि यदर्थे कीचको हतः। भीमसेनेन दुर्वृत्तः सहभ्रातृभिराहवे
श्रुत्वैतद्वचनं जिष्णोर्विस्मयस्फारितेक्षणः । पश्यन्ननिमिषः पार्थं शनैर्वाचमुवाच ह
दश पार्थस्य नामानि श्रूयन्ते मे कथासु च। प्रब्रूयास्तानि यदि मे श्रद्दध्यां सर्वमेव ते
अहं तर्हि तवाचक्षे दश नामानि तानि मे। वैराटे शृणु तानि त्वं यानि पूर्वं श्रुतानि ते। ईशानो विदधे देवस्त्रिदिवस्येश्वरो दिवि
अर्जुनः फल्गुनो जिष्णुः किरीटी श्वेतवाहनः। बीभत्सुर्विजयः पार्थः सव्यसाची धनञ्जयः। एतानि मम नामानि स्थापितानि सुरोत्तमैः
गुणतो दश नामानि समवेतानि पाण्डवे। चरन्ति लोके ख्यातानि विदितानि ममावघ
केनासि विजयो नाम केनासि श्वेतवाहनः। सव्यसाची च केनासि जिष्णुर्बीभत्सुरेव च
अर्जुनः फल्गुनः पार्थः किरीटी केन सारथे। धनञ्जयश्च केनासि शीघ्रं वद बृहन्नले
श्रुता मे तस्य वीरस्य केवला नामहेतवः। इतस्ततश्चलत्येतन्मनो मे चञ्चलं त्वयि। अर्जुनो वा भवान्नेति वद शीघ्रं बृहन्नले
सर्वाञ्जित्वा जनपदान्धनं चाच्छिद्य सर्वशः। मध्ये धनस्य तिष्ठन्तं तन्मामाहुर्धनञ्जयम्
अभिप्रयामि संग्रामे यदाऽहं युद्धदुर्मदान्। अजित्वा न निविर्तेयं तेन वै विजयं विदुः
श्वेताः काञ्चनसन्नाहा रथे युज्यन्ति मे हयाः। शत्रुभिर्युध्यमानस्य तेनाहं श्वेतवाहनः
किरीटं सूर्यसंकाशं भ्राजते मे शिरोगतम्। रणमध्ये रथस्थस्य सूर्यपावकसन्निभम्
अच्छेद्यं रुचिरं चित्रं जाम्बूनदपरिष्कृतम्। इन्द्रदत्तमनाहार्यं तेनाहुर्मां किरीटिनम्