भ्रुकुटिं च न कुर्वीत न चाङ्गुष्ठैर्लिखेन्महीम्। न च गाढं विजृम्भेत जातु राज्ञः समीपतः
न प्रशंसेन्ना चासूयेत्प्रियेषु च हितेषु च । स्तूयमानेषु वा तत्र दूष्यमानेषु वा पुनः
अथ संदृश्यमानेषु प्रियेषु च हितेषु च। श्रूयमाणेषु वाक्येषु वर्णयेदमृतं यथा
न राज्ञः प्रतिकूलानि सेवमानः सुखी भवेत्। पुत्रो वा यदि वा भ्राता यद्यप्यात्मसमो भवेत्
अप्रमत्तो हि राजानं रञ्जयेच्छीलसंपदा। उत्थानेन तु मेधावी शौचेन विविधेन च
स्नानं हि वस्त्रशुद्धिश्च शारीरं शौचमुच्यते। असक्तिः प्राकृतार्थेषु द्वितीयं शौचमुच्यते
राजा भोजो विराट् सम्राट् क्षत्रियो भूपतिर्नृपः । य एतैः स्तूयते शब्दैः कस्तं नार्चितुमर्हति
तस्माद्भक्त्या च युक्तः सन्सत्यवादी जितेन्द्रियः । मेधावी धृतिमान्प्राज्ञः संश्रयीत महीपतिम्
कृतज्ञं प्राज्ञमक्षुद्रं दृढभक्तिं जितेन्द्रियम् । वर्धमानं स्थितं स्थाने संश्रयीत महीपतिम्
एष वः समुदाचारः समुद्दिष्टो यथाविधि । यथार्थान्संप्रपत्स्यन्ते पार्थ राजोपजीविनः
संवत्सरमिमं तावदेवंशीला बुभूषथः । ततः स्वविषयं प्राप्य यथाकामं चरिष्यथ
तं तथेत्यब्रुवन्पार्थाः पितृकल्पं यशस्विनम्। प्रहृष्टाश्चाभिवाद्यैनमुपातिष्ठन्परंतपाः
तेषां प्रतिष्ठमानानां मन्त्रांश्च ब्राह्मणोऽजपत्। भवाय राज्यलाभाय वीर्याय विजयाय च
ततोऽब्रवीदसौ विप्रो वाचमाशीः प्रयुज्य च। स्वद्रव्यप्रतिलाभाय शत्रूणां मर्दनाय च
स्वस्ति वोस्तु शिवः पन्था द्रक्ष्यामि पुनरागतान्। इत्युक्ता हृष्टमनसो गुरुणा तेन धीमता। युधिष्ठिरमुखाः सर्वे गन्तुं समुपचक्रमुः
तेऽग्निं प्रदक्षिणं कृत्वा ब्राह्मणं च पुरोहितम्। अभिवाद्य ततः सर्वे प्रस्थातुमुपचक्रमुः ।। 1
अनुशिष्टोस्मि भद्रं ते नैतद्वक्ताऽस्ति कश्चन। कुन्तीमृते मातरं नः पितरं च यशस्विनम् ।। 2
यदेवानन्तरं कार्यं तद्भवान्वक्तुमर्हति। तारणाय तु दुःखस्य प्रस्थानाय भवाय च ।। 3
तेषां प्रतिष्ठमानानां धौम्यो मन्त्रानथाजपत्। सर्वविघ्नप्रशमनानर्थसिद्धिकरांस्तथा। ततः पावकमुञ्ज्वाल्य मन्त्रहव्यपुरुस्कृतम् ।। 4
याज्ञसेनीं पुरस्कृत्य सर्व एव महारथाः। प्राद्रवन्सह धौम्येन बद्धशस्त्रा वनाद्वनम् ।। 5
ते वीरा बद्धनिस्त्रिंशा धनुर्बाणकलापिनः । अगच्छन्भीमधन्वानः काम्यकाद्यमुनां नदीम् ।। 6
उत्तरेण दशार्णानां पाञ्चालान्दक्षिणेन तु। अन्तरेण यकृल्लोम्नः शूरसेनांश्च पाण्डवाः ।। 7
ते तस्या दक्षिणं तीरमन्वगच्छन्पदातयः । ततः प्रत्यक्प्रयातास्ते संक्रामन्तो वनाद्वनम् ।। 8
वसाना वनदुर्गेषु रमणीयेषु धन्विनः । पल्वलेषु च रम्येषु नदीनां संगमेषु च।। 9
द्रुमान्नानाविधाकारान्नानाविधलताकुलान् । कुसुमाढ्यान्मनःकान्ताञ्शुभगन्धान्मनोरमान् ।। 10
पार्था निरीक्षमाणाश्च तान्द्रुमान्पुष्पशालिनः। जिघ्रन्तः पुष्पगन्धांश्च फलगन्धान्मनोरमान् ।। 11
विध्यन्तो मृगजातानि महेप्वासा महाबलाः । उपित्वा द्वादशसमा वने परपुरंजयाः । लुब्धान्ब्रुवाणा मात्स्यस्य विपयं प्राविशंस्तदा ।। 12
तत्र धौम्यं महेप्वासाः पाण्डवेया व्यसर्जयन् । अग्निहोत्रं परिचरन्सोऽबुद्धोऽवसदाश्रमे ।। 13
ततस्तेषु प्रयातेषु पाण्डवेषु महात्मसु। इन्द्रसेनमुखाश्चैव यथोक्तं प्राप्य निर्वृताः। रथानश्वांश्च रक्षन्तः सुखमूषुः सुसंवृताः ।। 14
ततो जनपदं प्राप्य कृष्णा राजानमब्रवीत् ।। 15