गच्छध्वं विबुधाः सर्वे यथाकामं यथेप्सितम्। महता कालयोगेन प्रकृतिं यास्यतेऽर्णवः
ज्ञातींश्च कारणं कृत्वा महाराजो भगीथः। `पूरयिष्यति तोयौघैः समुद्रं निधिमम्भसाम्
पितामहवचः श्रुत्वा सर्वे विबुधसत्तमाः। कालयोगं प्रतीक्षन्तो जग्मुश्चापि यथागतम्
कथं वै ज्ञातयोब्रह्मन्कारणं चात्र किं मुने। कथं समुद्रः पूर्णश्च भगीरथपरिश्रमात्
एतदिच्छाम्यहं श्रोतुं विस्तरेण तपोधन। कथ्यमानं त्वया विप्र राज्ञां चरितमुत्तमम्
एवमुक्तस्तु विप्रेन्द्रो धर्मराज्ञा महात्मना। कथयामास माहात्म्यं सगरस्य महात्मनः
इक्ष्वाकूणां कुले जातः सगरो नाम पार्थिवः। रूपसत्वबलोपेतः स चापुत्रः प्रतापवान्
स हैहयान्समुत्साद्य तालजङ्घांश्च भारत। वशे च कृत्वा राजन्यान्स्वराज्यमनुशिष्टवान्
तस्य भार्ये त्वभवतां रूपयौवनदर्पिते। वैदर्भी भरतश्रेष्ठ शैव्या च भरतर्षभ
सपुत्रकामो नृपतिस्तप्यते स्म महत्तपः। पत्नीभ्यां सह राजेन्द्र कैलासं गिरिमाश्रितः
स तप्यमानः सुमहत्तपोयोगसमन्वितः। आससाद महात्मानं त्र्यक्षं त्रिपुरमर्दनम्
शंकरं भवमीशानं पिनाकिं शूलपाणिनम्। त्र्यम्बकं शिवमुग्रेशं बहुरूपमुमापतिम्
स तं दृष्ट्वैव वरदं पत्नीभ्यां सहितो नृपः। प्रणिपत्य महाबाहुः पुत्रार्थे समयाचत
तं प्रीतिमान्हरः प्राह सभार्यं नृपसत्तमम्। यस्मिन्वृतो मुहूर्तेऽहं त्वयेह नृपते वरम्
षष्टिः पुत्रसहस्राणि शूराः परमदर्पिताः। एकस्यां संभविष्यन्ति पत्न्यां नरवरोत्तम
ते चैवसर्वे सहिताः क्षयं यास्यन्ति पार्थिव। एको वंशधरः शूर एकस्यां संभविष्यति
एवमुक्त्वा तु तं रुद्रस्तत्रैवान्तरधीयत। स चापि सगरो राजा जगाम स्वं निवेशनम्
पत्नीभ्यां सहितस्तत्र होऽतिहृष्टमनास्तदा। `कालं शंभुवरप्राप्तं प्रतीक्षन्सगरोऽनयत्
तस्य तेमनुजश्रेष्ठ भार्ये कललोचने। वैदर्भी चैव शैब्या च गर्भिण्यौ संबभूवतुः
ततः कालेन वैदर्भी गर्भालाबुं व्यजायत। शैव्या च सुषुवे पुत्रं कुमारं देवरूपिणम्
तदाऽलाबुं समुत्स्रष्टुं मनश्चक्रे स पार्थिवः। अथान्तरिक्षाच्छुश्राव वाचं गंभीरनिःस्वनाम्
राजन्मा साहसंकार्षीः पुत्रान्न त्यक्तुमर्हसि। अलाबुमध्यान्निष्कृष्य वीजं यत्नेन गोप्यताम्
सोपस्वेदेषु पात्रेषु घृतपूर्णेषु भागशः। ततः पुत्रसहस्राणि षष्टिं प्राप्स्यसि पार्थिव
महादेवेन दिष्टं ते पुत्रजन्म नराधिप। अनेन क्रमयोगेन मा ते बुद्धिरतोऽन्यथा
एतच्छ्रुत्वान्तरिक्षाच्च स राजा राजसत्तमः। यथोक्तं तच्चराकाथ श्रद्दधद्भरतर्षभ
[एकैकशस्ततः कृत्वा बीजं बीजं नराधिपः। घृतपूर्णेषु कुम्भेषु तान्भागान्विदधे ततः
धात्रीश्चैकैकशः प्रादात्पुत्ररक्षणतत्परः। ततः कालेन महता समुत्तस्थुर्महाबलाः ।।]
षष्टिः पुत्रसहस्रणि तस्याप्रतिमतेजसः। रुद्रप्रसादाद्राजर्षेः समजायन्त पार्थिव
ते घोराः क्रूरकर्माण आकाशपरिसर्पिणः। बहुत्वाच्चावजानन्तः सर्वाल्लोँकान्सहामरान्
त्रिदशांश्चाप्यबाधन्त तथा गन्धर्वराक्षसान्। सर्वाणि चैव भूतानि शूरा समरशालिनः