भेर्यश्च मुरजाश्चैव मड्डुका गोमुखाश्च ये। शृङ्गवंशाम्बुजा वीणाः श्रूयन्ते स्म सहस्रशः
लोकेऽस्मिन्सर्वविप्राश्च वैश्याः शूद्रा नृपादयः। सर्वे म्लेच्छाः सर्वगणास्त्वादिमध्यान्तजास्तथा
नानादेशसमुद्भूतैर्नानाजातिभिरागतैः। पर्याप्त इव लोकोऽयं युधिष्ठिरनिवेशने
भीष्मद्रोणादयः सर्वे कुरवः ससुयोधनाः। वृष्णयश्च समग्राश्च पाञ्चालाश्चापि सर्वशः
यज्ञेऽस्मिन्सर्वकर्माणि चक्रुर्दासा इव क्रतौ। एवं प्रवृत्तो यज्ञः स धर्मराजस्य धीमतः
शुशुभे च महाबाहो सोमस्येव क्रतुर्यथा। वस्त्राणि कम्बलांश्चैव प्रावारांश्चैव सर्वदा
निष्कहेमजभाण्डानि भूषणानि च सर्वशः। प्रददौ तत्र विप्राणां धर्मराजो युधिष्ठिरः
यानि तत्र महीपालैर्लब्धवान्भरतर्षभः। तानि सर्वाणि रत्नानि ब्राह्मणानां ददौ तदा
ततः स कुरुराजस्य सर्वकर्मसमृद्धिमान्। यज्ञः प्रीतिकरो राजन्संबभौ विपुलोत्सवः
शान्तविघ्नः सुखारम्भः प्रभूतधनधान्यवान्। अन्नवान्बहुभक्ष्यश्च केशवेन सुरक्षितः
समापयामास च तं राजसूयं महाक्रतुम्। `कोटिसहस्रं प्रददौ ब्राह्मणानां महात्मनाम्
न करिष्यति तं लोके कश्चिदन्यो महीपतिः। याजकाः सर्वकामैश्च सततं ततृपुर्धनैः
ततश्चावभृथस्नातः स राजा पाण्डुनन्दनः। व्यासं धौम्यं वसिष्ठं च नारदं च महामुनिम्
सुमन्तु जैमिनिं पैलं वैशम्पायनमेव च। याज्ञवल्क्यं च कपिलं कपालं कौशिकं तथा। सर्वांश्च ऋत्विक्प्रवरान्पूजयामास सत्कृतान्
युष्मत्प्रसादात्प्राप्तोऽयं राजसूयो महाक्रतुः। जनार्दनप्रसादाद्धि सम्पूर्णो मे मनोरथः
अथ यज्ञं समाप्यान्ते पूजयामास माधवम्। बलदेव च देवेशं भीष्माद्यांश्च कुरूद्वहान्
ततस्त्ववभृथस्नातं धर्मात्मानं युधिष्ठिरम्। समस्तं पार्थिवं क्षत्रमुपगम्येदमब्रवीत्
दिष्ट्या वर्धसि धर्मज्ञ साम्राज्यं प्राप्तवानसि। आजमीढाजमीढानां यशः संवर्धितं त्वया
कर्मणैतेन राजेन्द्र धर्मश्च सुमहान्कृतः। आपृच्छामो नरव्याघ्र सर्वकामैः सूपूजिताः
स्वराष्ट्राणि गमिष्यामस्तदनुज्ञातुमर्हसि। श्रुत्वा तु वचनं राज्ञां धर्मराजो युधिष्ठिरः
यथार्हं पूज्य नृपतीन्भ्रातॄन्सर्वानुवाच ह। राजानः सर्व एवैते प्रीत्याऽस्मान्प्तमुपागताः
प्रस्थिताः स्वानि राष्ट्राणि मामापृच्छय परन्तपाः। अनुव्रजत भद्रं वो विषयान्तं नृपोत्तमान्
भ्रातुर्वचनमाज्ञाय पाण्डवा धर्मचारिणः। यथार्हं नृपतीन्सर्वानेकैकं समनुव्रजन्
विरायटमन्वायात्तूर्णं धृष्टह्युम्नः प्रतापवान्। धनञ्जयो यज्ञसेनं महात्मानं महारथम्
भीष्मं च धृतराष्ट्रं च भीमसेनो महाबलः। द्रोणं तु ससुतं वीरं सहदेवो युधां पतिः
नकुलः सुबलं राजन्सहपुत्रं समन्वयात्। द्रौपदेयाः ससौभद्राः पार्वतीयान्महारथान्
अन्वगच्छंस्तथैवान्यान्क्षत्रियान्क्षत्रियर्षभाः। एवं सुपूजिताः सर्वे जग्मुर्विप्राः सहस्रशः
गतेषु पार्थिवेन्द्रेषु सर्वेषु ब्राह्मणेषु च। युधिष्ठिरमुवाचेदं वासुदेवः प्रतापवान्
आपृच्छे त्वां गमिष्यामि द्वारकां कुरुनन्दन। राजसूयं क्रतुश्रेष्ठं दिष्ट्या त्वं प्राप्तवानसि
तमुवाचैवमुक्तस्तु धर्मराजो जनार्दनम्। तव प्रसादाद्गोविन्द प्राप्तः क्रतुवरो मया