एषा मया सम्पतता वारुणी भरतर्षभ। दृष्टपूर्वा सभा रम्या कुबेरस्य सभां शृणु
सभा वैश्रवणी राजञ्शतयोजनमायता। विस्तीर्णा सप्ततिश्चैव योजनानि सितप्रभा
तपसा निर्जिता राजन्स्वयं वैश्रवणेन सा। शशिप्रभा प्रावरणा कैलासशिखरोपमा
गुह्यकैरुह्यमाना सा खे विषक्तेव शोभते। दिव्या हेममयैरुच्चैः प्रासादैरुपशोभिता
महारत्नवती चित्रा दिव्यगन्धा मनोरमा। सिताभ्रशिखराकारा प्लवमानेव दृश्यते
दिव्या हेममयै रङ्गैर्विद्युद्भिरिव चित्रिता। तस्यां वैश्रवणो राजा विचित्राभरणाम्बरः
स्त्रीसहस्रैर्वृतः श्रीमानास्ते ज्वलितकुण्डलः। `सह पत्न्या महाराज ऋद्ध्या सह विराजते
सर्वाभरणभूषिण्या वपुष्मत्या धनेश्वरः'। दिवाकरनिभे पुण्ये दिव्यास्तरणसंवृते। दिव्यपादोपधाने च निषण्णः परमासने
मन्दाराणामुदाराणां वनानि परिलोडयन्। सौगन्धीकवनानां च गन्धं गन्धवहो वहन्
नलिन्याश्चालकाख्याया नन्दनस्य वनस्य च। शीतो हृदयसंह्लादी वायुस्तमुपसेवते
तत्र देवाः सगन्धर्वा गणैरप्सरसां वृताः। दिव्यतानैर्महाराज गायन्तिस्म सभागताः
मिश्रकेशी च रम्भा च चित्रसेना शुचिस्मिता। चारुनेत्रा घृताची च मेनका पुञ्जिकस्थला
विश्वाची सहजन्या च प्रम्लोचा उर्वशी
वर्गा च सौरभेयी च समीची बुद्बुदा लता। एताः सहस्रशश्चान्या नृत्तगीतविशारदाः
उपतिष्ठन्ति धनदं गन्धर्वाप्सरसां गणाः। अनिशं दिव्यवादित्रैर्नृत्तगीतैश्च स सभा
अशून्या रुचिरा भाति गन्धर्वाप्सरसां गणैः। किन्नरा नाम गन्धर्वा नरा नाम तथाऽपरे
माणिभद्रोऽथ धनदः श्वेतभद्रश्च गुह्यकः। कशेरको गण्डकण्डूः प्रद्योतश्च महाबलः
कुस्तम्बरुः पिशाचश्च गजकर्णो विशालकः। वराहकर्णस्ताम्रौष्ठः फलकक्षः फलोदकः
हंसचूडः शइखावर्तो हेमनेत्रो विभीषणः। पुष्पाननः पिङ्गलकः शोणितोदः प्रवालकः
वृक्षवास्यनिकेतश्च चीरवासाश्च भारत। एते चान्ये च बहवो यक्षाः शतसहस्रशः
सदा भगवती लक्ष्मीस्तत्रैव नलकूबरः। अहं च बहुशस्तस्यां भवन्त्यन्ये च मद्विधाः
ब्रह्मर्षयो भवन्त्यत्र तथा देवर्षयोऽपरे। क्रव्यादाश्च तथैवान्ये गन्धर्वाश्च महाबलाः
उपासते महात्मानं तस्यां धनदमीश्वरम्। भगवान्भूतसङ्घैश्च वृतः शतसहस्रशः
उमापतिः पशुपतिः शूलभृद्भगनेत्रहा। त्र्यम्बको राजशार्दूल देवी च विगतक्लमा
वामनैर्विकटैः कुब्जैः क्षतजाक्षैर्महारवैः। मेदोमांसाशनैरुग्रैरुग्रधन्वा महाबलः
नानाप्रहरणैरुग्रैर्वातैरिव महाजवैः। वृतः सखायमन्वास्ते सदैव धनदं नृप
प्रहृष्टाः शतशश्चान्ये बहुशः सपरिच्छदाः। गन्धर्वाणां च पतयो विश्वावसुर्हहा हुहूः
तुम्बुरुः प्रवतश्चैव शैलूषश्च तथाऽपरः। चित्रसेनश्च गीतज्ञस्तथा चित्ररथोपि च
एते चान्ये च गन्धर्वा धनेश्वरमुपासते। विद्याधराधिपश्चैव चक्रधर्मा सहानुजैः
उपाचरति तत्र स्म धनानामीश्वरं प्रभुम्। किन्नराः शतशस्तत्र धनानामीश्वरं प्रभुम्