वासुकिप्रमुखाश्चैव सर्वे प्राञ्जलयः स्थिताः। अनुज्ञाताश्च शेषेण यथार्हमुपविश्य च
एते चान्ये च बहवः सर्पास्तस्यां युधिष्ठिर। `वैनतेयश्च गरुडो ये चास्य परिचारिणः'। उपासते महात्मानं वरुणं विगतक्लमाः
बलिर्वैरोचनो राजा नरकः पृथिवीञ्जयः। संह्रादो विप्रचित्तिश्च कालखञ्जाश्च दानवाः
सुहनुर्दुर्मुखः शङ्खः सुमनाः सुमतिस्ततः। घटोदरो महापार्श्वः क्रथनः पिठरस्तथा
विश्वरूपः स्वरूपश्च विरूपोऽथ महाशिराः। दशग्रीवश्च वाली च मेघवासा दशावरः
टिट्टिभो विटभूतश्च संह्रादश्चेन्द्रतापनः। दैत्यदानवसङ्घाश्च सर्वे रुचिरकुण्डलाः
स्रग्विणो मौलिनश्चैव तथा दिव्यपरिच्छदाः। सर्वे लब्धवराः शूराः सर्वे विगतमृत्यवः
ते तस्यां वरुणं देवं धर्मपाशधरं सदा। उपासते महात्मानं सर्वे सुचरितव्रताः
तथा समुद्राश्चत्वारो नदी भागीरथी च सा। कालिन्दी विदिशा वेणा नर्दमा वेगवाहिनी
विपाशा च शतद्रुश्च चन्द्रभागा सरस्वती। इरावती वितस्ता च सिन्धुर्देवनदी तथा
गोदावरी कृष्णवेणी कावेरी च सरिद्वरा। किम्पुना च विशल्या च तथा वैतरणी नदी
तृतीया ज्येष्ठिला चैव शोणश्चापि महानदः। चर्मण्वती तथा चैव पर्णाशा च महानदी
सरयूर्वारवत्याऽथ लाङ्गली च सरिद्वरा। करतोया तथाऽऽत्रेयी लौहित्यश्च महानदः
लङ्घती गोमती चैव सन्ध्या त्रिस्रोतसी तथा। एताश्चन्याश्च राजेन्द्र सुतीर्था लोकविश्रुताः
सरितः सर्वतश्चान्यास्तीर्थानि च सरांसि च। कूपाश्च सप्रस्रवणा देहवन्तो युधिष्ठिर
पल्वलानि तटाकानि देहवन्त्यथ भारत। दिशस्तथा मही चैव तथा सर्वे महीधराः
उपासते महात्मानं सर्वे जलचरास्तथा। गीतवादित्रवन्तश्च गन्धर्वाप्सरसां गणाः
स्तुवन्तो वरुणं तस्यां सर्व एव समासते। महीधरा रत्नवन्तो रसा ये च प्रतिष्ठिताः
कथयन्तः सुमधुराः कथास्तत्र समासते। वारुणश्च तथा मन्त्री सुनाभः पर्युपासते
पुत्रपौत्रैः परिवृतो गोनाम्ना पुष्करेण च। सर्वे विग्रहवन्तस्ते तमीश्वरमुपासते
एषा मया सम्पतता वारुणी भरतर्षभ। दृष्टपूर्वा सभा रम्या कुबेरस्य सभां शृणु
सभा वैश्रवणी राजञ्शतयोजनमायता। विस्तीर्णा सप्ततिश्चैव योजनानि सितप्रभा
तपसा निर्जिता राजन्स्वयं वैश्रवणेन सा। शशिप्रभा प्रावरणा कैलासशिखरोपमा
गुह्यकैरुह्यमाना सा खे विषक्तेव शोभते। दिव्या हेममयैरुच्चैः प्रासादैरुपशोभिता
महारत्नवती चित्रा दिव्यगन्धा मनोरमा। सिताभ्रशिखराकारा प्लवमानेव दृश्यते
दिव्या हेममयै रङ्गैर्विद्युद्भिरिव चित्रिता। तस्यां वैश्रवणो राजा विचित्राभरणाम्बरः
स्त्रीसहस्रैर्वृतः श्रीमानास्ते ज्वलितकुण्डलः। `सह पत्न्या महाराज ऋद्ध्या सह विराजते
सर्वाभरणभूषिण्या वपुष्मत्या धनेश्वरः'। दिवाकरनिभे पुण्ये दिव्यास्तरणसंवृते। दिव्यपादोपधाने च निषण्णः परमासने
मन्दाराणामुदाराणां वनानि परिलोडयन्। सौगन्धीकवनानां च गन्धं गन्धवहो वहन्
नलिन्याश्चालकाख्याया नन्दनस्य वनस्य च। शीतो हृदयसंह्लादी वायुस्तमुपसेवते