विद्म ते स्वप्न जनित्रमभूत्याः पुत्रोऽसि यमस्य करणः । अन्तकोऽसि मृत्युरसि । तं त्वा स्वप्न तथा सं विद्म स नः स्वप्न दुष्वप्न्यात्पाहि
विद्म ते स्वप्न जनित्रं निर्भूत्याः पुत्रोऽसि यमस्य करणः । अन्तकोऽसि मृत्युरसि । तं त्वा स्वप्न तथा सं विद्म स नः स्वप्न दुष्वप्न्यात्पाहि
विद्म ते स्वप्न जनित्रं पराभूत्याः पुत्रोऽसि यमस्य करणः । अन्तकोऽसि मृत्युरसि । तं त्वा स्वप्न तथा सं विद्म स नः स्वप्न दुष्वप्न्यात्पाहि
विद्म ते स्वप्न जनित्रं देवजामीनां पुत्रोऽसि यमस्य करणः । अन्तकोऽसि मृत्युरसि । तं त्वा स्वप्न तथा सं विद्म स नः स्वप्न दुष्वप्न्यात्पाहि
अजैष्माद्यासनामद्यामूमनागसो वयम्
उषो यस्माद्दुष्वप्न्यादभैष्माप तदुच्छतु
द्विषते तत्परा वह शपते तत्परा वह
यं द्विष्मो यश्च नो द्वेष्टि तस्मा एनद्गमयामः
उषा देवी वाचा संविदाना वाग्देव्युषसा संविदाना
उषस्पतिर्वाचस्पतिना संविदानो वाचस्पतिना संविदानः
तेऽमुष्मै परा वहन्त्वरायान् दुर्णाम्नः सदान्वाः
कुम्भीकाः दूषीकाः पीयकान्
जाग्रद्दुष्वप्न्यं स्वप्नेदुष्वप्न्यम्
अनागमिष्यतो वरान् अवित्तेः संकल्पान् अमुच्या द्रुहः पाशान्
तदमुष्मा अग्ने देवाः परा वहन्तु वघ्रिर्यथासद्विथुरो न साधुः
तेनैनं विध्याम्यभूत्यैनं विध्यामि निर्भूत्यैनं विध्यामि पराभूत्यैनं विध्यामि ग्राह्यैनं विध्यामि तमसैनं विध्यामि
देवानामेनं घोरैः क्रूरैः प्रैषैरभिप्रेष्यामि
वैश्वानरस्यैनं दंष्ट्रयोरपि दधामि
एवानेवाव सा गरत्
योऽस्मान् द्वेष्टि तमात्मा द्वेष्टु यं वयं द्विष्मः स आत्मानं द्वेष्टु
निर्द्विषन्तं दिवो निः पृथिव्या निरन्तरिक्षाद्भजाम
सुयामंश्चाक्षुष
इदमहमामुष्यायणेऽमुष्याः पुत्रे दुष्वप्न्यं मृजे
यददोअदो अभ्यगछं यद्दोषा यत्पूर्वां रात्रिम्
यज्जाग्रद्यत्सुप्तो यद्दिवा यन् नक्तम्
यदहरहरभिगछामि तस्मादेनमव दये
तं जहि तेन मन्दस्व तस्य पृष्टीरपि शृणीहि
स मा जीवीत्तं प्राणो जहातु
जितमस्माकमुद्भिन्नमस्माकमृतमस्माकं तेजसस्माकं ब्रह्मास्माकं स्वरस्माकं यज्ञोऽस्माकं पशवोऽस्माकं प्रजा अस्माकं वीरा अस्माकम्
जितमस्माकमुद्भिन्नमस्माकमृतमस्माकं तेजोऽस्माकं ब्रह्मास्माकं स्वरस्माकं यज्ञोऽस्माकं पशवोऽस्माकं प्रजा अस्माकं वीरा अस्माकम् । तस्मादमुं निर्भजामोऽमुमामुष्यायणममुष्याः पुत्रमसौ यः । स निर्ऋत्याः पाशान् मा मोचि