तं सभा च समितिश्च सेना च सुरा चानुव्यचलन्
सभायाश्च वै स समितेश्च सेनायाश्च सुरायाश्च प्रियं धाम भवति य एवं वेद
तद्यस्यैवं विद्वान् व्रात्यो राज्ञोऽतिथिर्गृहान् आगच्छेत्
श्रेयांसमेनमात्मनो मानयेत्तथा क्षत्राय ना वृश्चते तथा राष्ट्राय ना वृश्चते ॥ अतो वै ब्रह्म च क्षत्रं चोदतिष्ठतां ते अब्रूतां कं प्र विशावेति
बृहस्पतिमेव ब्रह्म प्रविशत्विन्द्रं क्षत्रं तथा वा इति
अतो वै बृहस्पतिमेव ब्रह्म प्राविशदिन्द्रं क्षत्रम्
इयं वा उ पृथिवी बृहस्पतिर्द्यौरेवेन्द्रः
अयं वा उ अग्निर्ब्रह्मासावादित्यः क्षत्रम्
ऐनं ब्रह्म गच्छति ब्रह्मवर्चसी भवति
यः पृथिवीं बृहस्पतिमग्निं ब्रह्म वेद
ऐनमिन्द्रियं गच्छतीन्द्रियवान् भवति
य आदित्यं क्षत्रं दिवमिन्द्रं वेद
तद्यस्यैवं विद्वान् व्रात्योऽतिथिर्गृहान् आगच्छेत्
स्वयमेनमभ्युदेत्य ब्रूयाद्व्रात्य क्वावात्सीर्व्रात्योदकं व्रात्य तर्पयन्तु व्रात्य यथा ते प्रियं तथास्तु व्रात्य यथा ते वशस्तथास्तु व्रात्य यथा ते निकामस्तथास्त्विति
यदेनमाह व्रात्य क्वावात्सीरिति पथ एव तेन देवयानान् अव रुन्धे
यदेनमाह व्रात्योदकमित्यप एव तेनाव रुन्धे
यदेनमाह व्रात्य तर्पयन्त्विति प्राणमेव तेन वर्षीयांसं कुरुते
यदेनमाह व्रात्य यथा ते प्रियं तथास्त्विति प्रियमेव तेनाव रुन्धे
ऐनं प्रियं गच्छति प्रियः प्रियस्य भवति य एवं वेद
यदेनमाह व्रात्य यथा ते वशस्तथास्त्विति वशमेव तेनाव रुन्धे
ऐनं वशो गच्छति वशी वशिनां भवति य एवं वेद
यदेनमाह व्रात्य यथा ते निकामस्तथास्त्विति निकाममेव तेनाव रुन्धे
ऐनं निकामो गच्छति निकामे निकामस्य भवति य एवं वेद
तद्यस्यैवं विद्वान् व्रात्य उद्धृतेष्वग्निष्वधिश्रितेऽग्निहोत्रेऽतिथिर्गृहान् आगच्छेत्
स्वयमेनमभ्युदेत्य ब्रूयाद्व्रात्याति सृज होष्यामीति
स चातिसृजेज्जुहुयान् न चातिसृजेन् न जुहुयात्
स य एवं विदुषा व्रात्येनातिसृष्टो जुहोति
प्र पितृयाणं पन्थां जानाति प्र देवयानम्
न देवेष्वा वृश्चते हुतमस्य भवति
पर्यस्यास्मिंल्लोक आयतनं शिष्यते य एवं विदुषा व्रात्येनातिसृष्टो जुहोति