सर्वज्यानिः कर्णौ वरीवर्जयन्ती राजयक्ष्मो मेहन्ती
मेनिर्दुह्यमाना शीर्षक्तिर्दुग्धा
सेदिरुपतिष्ठन्ती मिथोयोधः परामृष्टा
शरव्या मुखेऽपिनह्यमान ऋतिर्हन्यमाना
अघविषा निपतन्ती तमो निपतिता
अनुगच्छन्ती प्राणान् उप दासयति ब्रह्मगवी ब्रह्मज्यस्य
वैरं विकृत्यमाना पौत्राद्यं विभाज्यमाना
देवहेतिर्ह्रियमाणा व्यृद्धिर्हृता
पाप्माधिधीयमाना पारुष्यमवधीयमाना
विषं प्रयस्यन्ती तक्मा प्रयस्ता
अघं प्रच्यमाना दुष्वप्न्यं पक्वा
मूलबर्हणी पर्याक्रियमाणा क्षितिः पर्याकृता
असंज्ञा गन्धेन शुगुद्ध्रियमाणाशीविष उद्धृता
अभूतिरुपह्रियमाणा पराभूतिरुपहृता
शर्वः क्रुद्धः पिश्यमाना शिमिदा पिशिता
अवर्तिरश्यमाना निर्ऋतिरशिता
अशिता लोकाच्छिनत्ति ब्रह्मगवी ब्रह्मज्यमस्माच्चामुष्माच्च
तस्या आहननं कृत्या मेनिराशसनं वलग ऊबध्यम्
अस्वगता परिह्णुता
अग्निः क्रव्याद्भूत्वा ब्रह्मगवी ब्रह्मज्यं प्रविश्यात्ति
सर्वास्याङ्गा पर्वा मूलानि वृश्चति
छिनत्त्यस्य पितृबन्धु परा भावयति मातृबन्धु
विवाहां ज्ञातीन्त्सर्वान् अपि क्षापयति ब्रह्मगवी ब्रह्मज्यस्य क्षत्रियेणापुनर्दीयमाना
अवास्तुमेनमस्वगमप्रजसं करोत्यपरापरणो भवति क्षीयते
य एवं विदुषो ब्राह्मणस्य क्षत्रियो गामादत्ते
क्षिप्रं वै तस्याहनने गृध्राः कुर्वत ऐलबम्
क्षिप्रं वै तस्यादहनं परि नृत्यन्ति केशिनीराघ्नानाः पाणिनोरसि कुर्वाणाः पापमैलबम्
क्षिप्रं वै तस्य वास्तुषु वृकाः कुर्वत ऐलबम्
क्षिप्रं वै तस्य पृच्छन्ति यत्तदासी३ इदं नु ता३ इति
छिन्ध्या छिन्धि प्र छिन्ध्यपि क्षापय क्षापय